Top

CNE identifika sidadaun Indonézia tenta vota iha Liquiça no RAEOA

Komunidade sira ezerse nia diretu votu, iha Sentru Votasaun Eskola Ensinu Bázika Númeru 1 Faról Dili, domingu (21/05). Imajen Tatoli/Francisco Sony.

DILI, 21 maiu 2023 (TATOLI)—Komisaun Nasionál Eleisaun (CNE) identifika iha sidadaun Indonézia balun iha kartaun eleitorál no tenta atu vota iha Liquiça no Rejiaun Administrativu Espesiál Oé-Cusse (RAEOA, maibé PNTL halo kedas intervensaun.

“Iha munisípiu Liquiça no RAEOA identifika sidadaun Indonézia tenta atu vota no iha duni kartaun eleitorál maibé PNTL interven tiha,” Diretór Nasionál ba Formasaun Partidu Polítiku, Mídia no Dokumentasaun, Carlos Alves Lopes, hateten iha konferénsia imprensa iha CNE, Colmera, domingu ne’e.

Nune’e mós, CNE simu reklamasaun hosi reprezentante partidu polítika balun hateten sentru votasaun balun iha Dili, materiál propaganda polítika balun taka besik iha sentru votasaun sira ne’ebé seidauk hasai.

“Nune’e, bazea ba informasaun CNE nasionál orienta Diretór CNE Dili hodi koordena ho autoridade seguransa hodi hasai imediata iha fatin votasaun sira,” nia dehan.

CNE mós simu informasaun hosi eleitór sira katak tinta indelével la kualidade, nune’e atu klarifika katak tinta indelével iha kualidade di’ak ne’ebé hetan aseitasaun hosi reprezentante partidu polítiku tabva kestaun tinta ne’e metodu uza hosi ofisiál eleitorál iha sentru votasaun.

CNE identifika reprezentante fiskal partidu tenta vota dala rua, maibé kazu ne’e autoridade seguransa halo ona intervensaun.

Iha mós eleitór balun fakar tinta indelével ba ofisiál eleitorál hafoin vota hotu, no aleinde ne’e identifika mós ofisiál simu eleitór balun ne’ebé idade sei 16 no iha balun ne’ebé hasai foto ba nia votu maibé parte responsavél halo intervensaun kedas.

“Iha Aileu, sidadaun ho idade 16 ne’ebé akompañia eleitór ho kondisaun defisiénsia matan maibé ofisiál eleitorál fó buletin votu ba na’in-rua mezmu idade seidauk to’o. Maibé PNTL ho STAE ho CNE halo koordenasaun hodi hasai tiha buletin votu ne’e hosi labarik sira,” nia dehan.

Kestaun seluk, CNE identifika ema balun lori Baycline ba sentru votasaun maibé autoridade seguransa halo intervensaun kedas.

Iha Lautém, identifika militante partidu polítika balun uza roupa uniforme partidu nian hodi tama sentru votasaun, CNE halo kedas intervensaun, no iha sentru balun mós uza telefone hodi tama ba fatin votasaun.

Entretantu, durante distribui no transporta materiál sensitivu no la’ós sensitivu ba munisípiu sira ne’e, uza karreta funeráriu no brigade sira hulan de’it material ba sentru votasaun tanba la asesu estrada.

“Distribuisaun materiál sensitivu no la’ós sensitivu ba eleisaun parlamentár 21 maiu, CNE identifika distribuisaun materiál sensitivu no la’ós sensitive ne’e STAE aluga transporte públiku hodi transporta materiál ba munisípiu sira. Hanesan iha Ainaro, STAE uza karreta funeráriu no iha balun ne’ebé brigada inklui fiskais partidu sira hulan de’it materiál ba sentru votasaun tanba labele asesu dalan,” nia dehan.

Kestaun seluk, nia dehan, CNE identifika iha sentru votasaun iha postu administrativu balun ne’e iha eletrisidade maibé labele funsiona tanba kauza hosi udan no anin, hanesan akontese iha iha postu administrativu Quelicai-Baucau nian no Lolotoe-Bobonaro.

Jornalista : Osória Marques

Editór      : Cancio Ximenes

Publisidade

Leave a Reply

Latest Post

error: Content is protected !!