ERMERA, 21 maiu 2023 (TATOLI) – Partidu Congresso Nacional para a Reconstrução de Timor-Leste (CNRT), hetan votu maioria no Frente Revolucionária de Timor-Leste Independente (FRETILIN), okupa segundu lugár iha Eleisaun Parlamentár, iha Suku Ponilala, Postu Administrativu Ermera, Munisípiu Ermera.
Tuir rezultadu votasaun iha Suku Ponilala, CNRT hetan votu hamutuk 936, FRETILIN akumula votu 727, KHUNTO 308, PD 93, PLP 57, PUDD 50, no partidu kiik seluk hetan votu lato’o 10.
Enkuantu, iha eleisaun ne’e, STAE rejista votu nulu hamutuk 48, votu branku lima no votu rezeitadu ida.
Koordendór Brigadista STAE Suku Ponilala, Dulcio dos Santos Martins, haktuir katak tuir dadus STAE, Suku Ponilala rejista votante hamutuk 2888. No husi votante sira ne’e, 2355 eleitór mak ezerse sira-nia direitu demokrátiku hodi vota iha eleisaun paralmentár ne’e.
Eleisaun Parlamentár iha suku Ponilala lao ho hakmatek no kontroladu tanba kooperasaun di’ak entre autoridade lokál, Polisía Nasionál Timor-Leste (PNTL), Forsa Defeza Nasionál Timor-Leste (FDTL), birgadista STAE, CNE, ofísial Fiscais no votante sira.
Dulcio dehan ein termu tékniku, STAE Ponilala organiza prosesu eleitorál tomak ho di’ak no susesu tanba laiha faillansu no insidente ruma: “Ita lao tuir orientasaun no prosesu tomak. Ita la rejista faillansu ruma no prosesu tomak lao ho di’ak.”
Xefe Suku Ponilala, Amaro Silvero dos Santos apresia ho partisipasaun eleitores Suku Ponilala nian tanba votu ho hakmatek hodi kontribui ba páz no dame.
“Ita iha Sentru Votasaun haat iha suku Ponilala, no tuir autoridade lokál nia observasaun, situasaun lao hakmatek hahu husi tuku 7 to kontazen votu hotu,” Amaro ba TATOLI, iha Suku Ponilala, domingu ne’e.
Iha fatin hanesan, Ofísial Polísia Suku (OPS), Herculano Soares Trindade haktuir katak Polísia Nasionál Timor-Leste (PNTL) akompaña prosesu eleitorál tomak hahu husi distribuisaun materiais sensitivu ba Sentru Votasaun haat iha suku Ponilala to kontazen votu remata.
“Situasaun jerál iha Suku Ponilala lao kontroladu. Populasaun ezerse sira-nia direitu demokrátiku hodi vota ho hakmatek. Ita la rejista perturbasaun ruma, ka dezintendimentu ruma no situasaun lao normal,” Herculano akresenta.
Jornalista: Filomeno Martins
Editora: Nelia Borges
