HEADLINE, KAPITÁL

Don Virgílio : povu mak sai xave ba vitória

Don Virgílio : povu mak sai xave ba vitória

Arsebispu Arkidioseze Metropolitana Dili, Don Virgílio do Carmo da Silva. Imajen Tatoli/Egas Cristóvão

DILI, 21 maiu 2023 (TATOLI)Arsebispu Arkidioseze Metropolitana Dili, Don Virgílio Karedeál do Carmo da Silva, hato’o parabéns ba povu Timor-Leste ne’ebé ohin ezerse ona sira-nia direitu votu ba Eleisaun Parlamentár 2023.

Don Virgílio dehan, timor-oan hotu ohin hakat tan dala-ida bá sentru votasaun no ezerse direitu nu’udar timor-oan hodi hili nai-ulun sira ne’ebé sei reprezenta povu tuur iha Parlamentu Nasionál no kaer Governu ba períodu tinan-lima mai.

“Ida-ne’e direitu demokrátiku. Festa demokrasia loron ohin, ida-idaik iha liberdade hili ona nia direitu nu’udar nasaun demokrátiku, ita hein ida-ne’ebé mak povu hili mak hanesan povu nia hakarak atu ukun, ita hotu hein nia rezultadu tanba ida-ne’ebé mak sei determina xave ba vitória ne’e povu, ida-ne’ebé mak povu determina sai manán ita hotu kontente simu rezultadu,” Don Virgílio, hateten hafoin ezerse nia direitu votu iha sentru votasaun iha sede suku Bidau Lecidere, domingu ne’e.

Notísia relevante : Igreja husu povu respeita malu iha kampaña no eleisaun

Biban ne’e, nia hato’o parabéns ba partidu polítiku sira ne’ebé kompete iha Eleisaun Parlamentár 2023 tanba hatudu ona maturidade polítika.

“Hanoin nasaun demokrátika ita hatudu ona, mai ita koko kontinua ida-ne’e hanesan dalan atu eduka ita-nia povu, ha’u mós hato’o parabéns ba partidu polítiku sira ne’ebé durante tempu kampaña maski iha naksalak oituan maibé hatudu duni sira-nia maturidade no buat hotu la’o di’ak. Ha’u hanoin istória la’o ba oin ida ne’ebé hetan posibilidae atu kaer ukun tinan-lima mai, hanoin povu fó tan oportunidade atu sira mellora programa no planu hotu ne’ebé sira hato’o iha tempu kampaña,” nia akresenta.

Biban ne’e, Don Virgílio mós apela ba partidu polítiku sira atu kontrola militante no simpatizante hodi hein rezultadu eleisaun.

“Ita tenke hatudu nafatin disiplina iha nasaun demokrásia ida-ne’e, tanba festa ida-ne’e sei hatudu tan ba mundu katak Timor iha maturidade, maski nasaun foun maibé ita bele sai modelu ba nasaun sira seluk, oinsá mak ita moris demokrasia liuhosi eleisaun ida-ne’e ita hatudu tiha ona. Husu ba joven sira no simpatizante partidu mai ita kontinua la’o ba oin sai di’ak liután liuhosi valór dekmorátiku ne’ebé ita hatudu daudaun iha ita-nia istória,” nia fó hanoin.

Iha fatin hanesan, Xefe suku Bidau Lecidere, postu administrativu Nain Feto, munisípiu Dili, Luís Soares Pereira, informa, suku ne’e rejista eleitór hamutuk 1.150.

“Ha’u-nia esperansa ba membru Governu foun mai karik, partidu polítiku sira ne’ebé sei manán tenke halo tuir komprimísu sira ne’ebé hato’o ona iha tempu kampaña, liuliu problema sosiál sira hanesan bee-moos, estrada no seluk tan ne’ebé komunidade hasoru durante ne’e,” nia dehan.

Tuir observasaun Jornalista Agência Tatoli iha terrenu, nota katak situasaun iha ámbitu eleisaun hosi dadersaan to’o lorokraik ne’e la’o di’ak, ne’ebé hetan seguransa másimu hosi Polísia Nasionalál Timor-Leste (PNTL) inklui akompaña hodi fiskál partidu, observadór nasionál no internasionál inklui entidade relevante.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!