Eleisaun parlamentár iha Baucau la’o ho hakmatek
BAUCAU, 21 maiu 2023 (TATOLI) – Prosesu eleisaun parlamentár iha sentru votasaun 150, munisípiu Baucau la’o ho hakmatek no susesu.
Diretór STAE Munisípiu Baucau, Natividade Freitas Guterres, esplika, hahú preparasaun hosi tuku 06:00 to’o votasaun iha oras 07:00 inklui too remata iha oras 15:00, maske iha fallansu balun maibé konsege remata ho susesu.
“Sentru hotu iha Baucau laran konfirma ona katak prosesu eleisaun la’o ho hakmatek no susesu,” Diretór STAE Munisípiu Baucau informa ba Agência TATOLI iha Vila Nova, domingu ne’e.
STAE Baucau rejista fallansu balun hanesan boletín votu iha sentru votasaun lato’o tanba eleitór barak no lista naran no númeru kartaun eleitorál internadu sala.
Kona-ba tinta ne’ebé hetan reklamasaun hosi eleitór sira, STAE konsidera tinta refere kualidade di’ak maske menutu dahuluk hafoin eleisaun eleitór barak koko hamoos maibé liutiha nune’e tinta refere la moos hosi liman.
Maske nune’e STAE Baucau liuhosi ekipa tékniku sira konsege rezolve fallansu refere hanesan meiu alokasaun fali boletín votu hosi sentru votasaun besik iha suku ne’ebé eleitór sira vota ba.
“Kada suku ida sentru votasaun barak entaun la konsege kalkula eleitór sira iha sentru votasaun sira,” Natividade Guterres akresenta.
Hosi observadaun Agência TATOLI nota, realizasaun eleisaun parlamentár iha sentru votasaun Baucau Vila la’o ho hakmatek inklui hetan seguransa másimu hosi membru PNTL no hahú halo kontajen votu iha oras 15:00 resin.
STAE Baucau rejista sentru votasaun 150 no estasaun votu hamutuk 180 hosi tótal brigada na’in-150 no ofisiál eleitorál hamutuk 1.800 hosi tótal eleitór 99.158.
Jornalista : Natalino Belo
Editór : Evaristo Soares Martins
