NASIONÁL, INTERNASIONÁL, DILI, HEADLINE

ElPar 2023 : Fiar CNRT sei manán, Xanana: joven labele provoka malu

ElPar 2023 : Fiar CNRT sei manán, Xanana: joven labele provoka malu

Prezidente Partidu Congresso Nacional de Reconstrução de Timor-Leste (CNRT), José Alexandre Kayrala Xanana Gusmão.Imajen Tatoli /Egas Cristóvão

DILI, 21 maiu 2023 (TATOLI)— Prezidente Partidu Congresso Nacional de Reconstrução de Timor-Leste (CNRT), José Alexandre Kayrala Xanana Gusmão fiar partidu ho numeru sorteiu 12 sei manán iha Eleisaun Parlamentar (ElPar) 2023.

Xanana Gusmão dader ne’e akompaña husu nia oan Mane Kay Olok ezerse sira nia direitu hanesan sidadaun ida liu husi votasaun iha sede suku Balibar Dili.

“Saida mak ha’u hein CNRT sei manán, klaru hotu-hotu husu ba ha’u tenke ba Primeiru Ministru  no nu’udar responsabildiade la’os atu ba tur, nu’udar responsabilidade ba rai no ba povu ida ne’e, selae ita ba tur deit,” Xanana Gusmão hafoin tuir votasaun dehan ba jornalista sira iha Sede Suku Balibar.

Lidér Karimatiku ne’e deklara CNRT preparadu ona hodi reliza hikas fila -fali PEDN (Planu Estratéjiku Desenvolvimentu Nasionál) 2011 – 2030 ne’ebé hela deit tinan neen (6) nia laran.

“CNRT preparadu tanba iha PEDN ba 2011 – 2030 ne’ebé hela tinan neen (6) nia laran. Ne’e duni preparadu atu kaer fila fali no hare’e fali no atu halo objesaun diak ida oinsa bele lori rai ne’e ba diak no ba povu nia moris,” nia deklara.

Prezidente Partidu ne’e fiar CNRT sei manán absoluta iha ElPar 2023 nune’e laiha planu hodi halibur partidu seluk hodi kaer ukun tanba lakohi repete fila fali pasadu ne’ebé liu ona.

Xanana Gusmão nafatin husu ba povu tomak hodi ezerse sira nia direitu demokratiku tanba ida ne’e mak estadu direitu demokratiku, garante paz, estabilidade no laiha violensia.

Nune’e mos ba militante no simpatizante CNRT nian, karik manán iha eleisaun ne’e labele halo provokasaun oin-oin no labele simu provokasaun oin-oin para estraga ambiente.

“Ha’u husu ba joven sira husi partidu seluk ne’ebé gosta provoka favor ida ita respeita malu ba, la’e ita la tuir fali festa demokrasia, festa demokrasia dehan katak ita hotu kontente, buat hotu manán ka lakon ne’e jogu ida, favor ida sai sidadaun diak,” Xanana Gusmão afirma.

Nia hatete, antes ne’e CNRT lakon iha ElPar 2017 no hosi governu iha 2020 maibé la provoka situasaun ruma no povu komesa hare’e ida ne’e bele garante paz no estabilidade. 

Jornalista : Cidalia Fátima

Editora     : Armandina Moniz

iklan
iklan

Leave a Reply

iklan
error: Content is protected !!