DILI, 21 maiu 2023 (TATOLI) – Prezidente Partidu Frente Revolusionária Timor-Leste Independente (FRETILIN), Francisco Guterres Lú Olo, garante rezultadu eleisaun parlamentár tinan ne’e sei lori vitória ba FRETILIN.
“Sentimentu atu hamentin pás ho estabilidade no dezenvolvimentu ba ita nia-rain. Buat hothotu ami ko’alia hotu ona iha kampanã eleitorál, naturalmente ami hakarak lori FREATILIN ba vitória”, informa Francisco Guterres Lú Olo, ba jornalista sira, hafoin ezerse nia direitu votu, iha EBC Farol, Díli.
Tuir líder ne’e, FRETILIN hatudu ona nia kapasidade atu bele mantém pás no estabilidade durante períodu kampaña eleitorál.
“FRETILIN asina ona plataforma ou akordu pré-eleitorál ho Partidu Libertasaun Popular (PLP) no Partidu Kmanek Haburas Unidade Nasionál Timor Oan (KHUNTO) bele garante estabilidade no dezenvolvimentu nasionál”, nia realsa.
Lú Olo husu ba eleitór sira atu hakbesik-an ba sentru votasaun sira ne’ebé besik atu ezerse direitu votu no direitu síviku, apela mós ba militante hotu atu simu rezultadu eleisaun ninian.
Tuir dadus husi Sekretariadu Tékniku Administrasaun Eleitorál (STAE), suku Motael, postu administrativu Vera Cruz, munisípiu Díli, rejista eleitorál hamutuk 4.604 no sentru votasaun lima.
Jornalista: Domingos Piedade Freitas
Editora: Isaura Lemos de Deus
