DILI, 21 maiu 2023 (TATOLI)—Prezidente Partidu Repúblikanu (PR), João Saldanha, louva prosesu eleisaun parlamentár ne’ebé organiza hosi órgaun eleitorál la’o di’ak hodi eleitór ida-idak ba vota ho situasaun hakmatek.
“Hanesan Prezidente Partidu, lista númeru ida Partidu Repúblikanu ninian kontente tanba bele ba vota laiha disturbiu, situasaun la’o ho di’ak. Funsionáriu STAE, CNE sira hala’o sira-nia serbisu di’ak, atende votante no eleitór hotu. Ne’ebé, ita bele dehan hotu-hotu la’o tuir ida-ne’e hodi organiza ita-nia votante sira bele ba vota ba partidu sé de’it tuir nia preferénsia,” Prezidente Partidu Repúblikanu ne’e hateten ba Agência Tatoli hafoin ezerse direitu votu iha fatin votasaun eskola primaria públiku númeru 4 Kuluhun, postu administrative Kristu Rei, munisípiu Dili, domingu ne’e.
Nia hatutan, hosi Partidu Repúblikanu nia-parte hein katak votante sira vota ba PR, maibé depende ba preferénsia ida-idak nian, no PR fiar iha eleisaun ida-ne’e sei lori rezultadu di’ak hodi hetan asentu iha parlamentár.
“Ami hanesan partidu, primeiru objetivu katak Partidu Repúblikanu tenke eziste iha Timor-Leste. Segundu, ami mós organiza sei minimál hela, maibé ami-nia kampaña la’o di’ak no partisipasaun mós di’ak tuir duni planu ne’ebé ami halo katak vizita ho diálogu de’it, ita la ba halo palku boot, la mobiliza ema barak, maibé ema sira sei fiar ba ami-nia programa ne’ebé realístiku bele ezekuta,” nia hateten.
Tanba ne’e, PR fiar katak bele hetan pontu signifikativu no nia parte hein katak votante sira sei fó votu barak, tanba partidu iha programa di’ak.
“Bainhira fó votu barak mak PR ba iha Parlamentu Nasionál hodi hala’o programa sira-ne’e hanesan halakon lei pensaun vitalísia ho programa sira seluk tan. Ne’ebé, ami fiar katak hotu-hotu barak mak sei vota ba PR tanba ho programa di’ak,” nia hateten.
Prezidente Partidu ne’e mós prontu simu rezultadu saida de’it ne’ebé povu deside iha eleisaun parlamentár ne’e.
“Ami kompete ho laran moos ho programa di’ak. Ami hakarak atu Partidu Repúblikanu tama hodi hala’o programa sira-ne’e. Rezultadu depois mak ita ko’alia tan, maibé prosesu la’o di’ak. PR organiza nia an didi’ak para atu sai alternativu aban bainrua,” nia dehan.
Lidér másimu Partidu Repúblikanu ne’e, hakarak apela ba militante no povu tomak katak timoroan hotu kontente bele ezerse ona direitu no dever demokrátiku ninian, partisipa ona vota hodi hili númeru saida de’it, importante mantein pás iha nasaun ida-ne’e hodi bele la’o hamutuk ba oin.
Jornalista : Nelson de Sousa
Editór : Cancio Ximenes
