iklan

NASIONÁL, DILI, POLÍTIKA

PD apela militante sira hakmatek hodi rona rezultadu eleisaun

PD apela militante sira hakmatek hodi rona rezultadu eleisaun

Prezidente Partidu PD (PD), Mariano Assanami Sabino (Imagem Tatoli/Jose De Sa)

DILI, 21 maiu 2023 (TATOLI)- Prezidente Partidu Demokrátiku (PD), Mariano Assanami Sabino, apela ba militante hotu hakmatek iha ida-ida nia fatin hodi simu rezultadu eleisaun parlamentár tinan 2023.

“Ita hotu espera katak povu nia votu ne’e, sei sai rezultadu ida ne’ebé fó benefísiu ba povu nia moris. Ita espera sei la iha manipulasaun ruma, tanba direitu povu nian, nu’udar direitu umanu ba sidadaun ida-ida,’’ Prezidente Partidu Demokrata, Mariano Assanami Sabino informa ba jornalista sira hafoin ezerse nia direitu hanesan sidadaun Timoroan, iha Sentru votasaun, Naroman Perunas Bairro Pité, Domingu ne’e.

Assanami hatutan, eleisaun parlamentár kada tinan, povu selebra hodi ezerse sira-nia direitu votu ba partidu ida ne’ebé sei garante moris di’ak ba ema hotu, tanba ne’e Partidu Demokrata prontu simu rezultadu saida de’it maka sei mosu, tanba povu mak iha direitu tomak hodi hili partidu ida ne’ebé sira hakarak.

“Ita prontu atu simu rezultadu saida de’it. Ita tenke komprende katak manan ka lakon, povu mak deside, ita tenke fuan bo’ot hodi simu rezultadu ne’ebé sei anuns’iu iha oras balun nia naran tán,’’Líder partidu ne’e subliña

Assanami mos hatutan,  oras ne’e tama ona ba era téknolojia, innovative no modernu atu Timor-leste kompete ho nasaun dezenvolvidu seluk, tanba ne’e tempu ona joven sira atu halo tranzisaun ida ne’ebé maka demokrátiku.

“Timor-Leste oras ne’e adere ona ba membru ASEAN, tanba ne’e presiza tebes atu partidu sira hotu hamutuk atu kontribui ba dezenvolvimentu nasaun hodi lori moris di’ak ba povu tomak,”

Entretantu, Assanami mós optimista, PD sei hetan kadeira husi 12 to’o 15, atu asegura program PD, bele implementa tuir kompromisu polítiku PD nian.

 

Jornalista: José Belarmino De Sá

Editora: Nelia Borges

iklan
iklan

Leave a Reply

iklan
error: Content is protected !!