DILI, 21 maiu 2023 (TATOLI)—Vise Prezidente Asuntu Polítika Eleitorál, Partidu Demokratiku Kristaun (PDC) Domingos da Costa, husu ba Governasaun ne’ebé mak ukun tenke ukun ho fuan.
“Nu’udar sidadaun ohin ami mai ona ezerse ona direitu maibé ba Governasaun foun ne’ebé mak ukun tenke ukun ho fuan la bele ukun ho kakutak tanba joven barak nafatin sai dezempregu,” Domingos da Costa informa bainhira ramata ezerse nia direitu iha sentru votasaun Gricenfor, ohin.
Hanesan reprezentante partidu Demokrátiku Kristaun hakarak nafatin fó hanoin ba ukun-na’in sira se de’it mak ukun tenke ukun ho fuan.
Governasaun sira ne’ebé mak ukun hadi’a infraestrutura bázika iha munisípiu no inan-aman sira ne’ebé mak iha suku aldeia sei terus nafatin ba hela fatin sira.
“Durante ne’e estrada, bee moos, saúde edukasaun seidauk sufisiente; ba Governasaun sira ne’ebé mak ukun karik bele haree ba problema sira ne’e,” nia afirma.
Tinan barak infraestrutura bázika sira iha munsípiu hotu, tuir PDC, sei nafatin problema tanba ne’e hanesan líder partidu ida, husu ba na’in ulun sira se mak sa’e ba ukun tenke ukun ho fuan hodi nune’e bele hadi’a fatin sira ne’e, inan-aman sira la’o ba mai ho di’ak.
Tuir observasaun TATOLI iha terrenu katak iha sentru votasaun Gricenfor la’o ho di’ak tanba hetan seguransa másimu husi Potlisia Nasionál Timor Leste.(PNTL).
Entretantu, iha Gricenfor iha sentru votasaun ida ho totál eleitór hamutuk 1.039, total livru hamutuk 26 no totál boletim votu hamutuk 1.143.
Jornalista : Felicidade Ximenes
Editór. : Rafael Ximenes de A. Belo
