iklan

NASIONÁL, DILI, POLÍTIKA

PDN prontu kontribui ba páz

PDN prontu kontribui ba páz

Foto espesiál

DILI, 21 maiu 2023 ( TATOLI)–  Sekretáriu Jerál Partidu Dezenvolvimentu Nasionál (PDN), Lucas Soares Colibere, hateten  sei simu rezultadu Elisausan Parlamentár ( ELPAR) husi desizaun povu nian no kontribui ba páz no estabilidade iha Timor – Leste.

“Lori PDN nia naran hau hakarak sauda no solisita povu Timor – Leste tomak ne,ebé ezerse ona direitu  votu liuhosi eleisaun parlamentár 21 maiu 2023. PDN prontu simu desizaun husi povu no karik povu fiar PDN sei realiza hotu kompromisiu polítika ne,ebé antes ne,e hato,o ona ba povu hodi hadi’a povu nia moris. Karik povu la hili mós PDN sei kontribui ba páz no estabilide hodi ita hamutuk  ho partidu sira ne,ebé  povu hili hodi ukun ita no halo dezenvolvimentu ba povu tomak iha Timor – Leste,” hateten Sekretáriu Jerál PDN, Lucas Soares Colibere, husi Likisa liuhosi telefone ba TATOLI iha domingo ne,e.

Nia hatutan, PDN sei la triste karik la hetan bareira hodi ba tur iha Parlamentu Nasionál, maibé sei kontinua eziste hodi kontinua luta partidu nian iha tinan lima oin mai.

“Demokrásia mak nune’e lakon ka manan povu mak deside, maibé PDN nia ezisténsia sei la lakon iha Timor – Leste, hodi nafatin kontiribui ba dezenvolvimentu nasionál iha Timor – Leste liuhosi meus seluk,” nia dehan.

Nia reafirma PDN nia hakarak mak povu Timor – Leste tenke solidu no unidu hodi promove páz no estabilidade, nune’e  ukun nain sira bele halo dezenvolvimentu iha nasaun ida ne,e hodi fó moris di’ak ba povu.

“Hakarak sauda no solisita povu tomak mai Ita hamutuk hodi dezenvolve nasaun ida ne,e, PDN prontu simu desizaun saida de’it husi povu, manan ka lakon demokrásia mak nune’e, importante mak Timor – Leste tenke iha páz no estabilide atu nune’e, governasaun foun bele implementa nia programa ho di’ak hodi dezenvolve Timor – Leste no  povu nia moris di’ak iha tinan lima oin mai,” nia hateten.

Jornalista : Camilio de Sousa

Editora: Nelia Borges

iklan
iklan

Leave a Reply

iklan
error: Content is protected !!