DILI, 21 maiu 2023 (TATOLI) – Presidente Partido Socialista Timorense (PST), Avelino Coelho, afirma sei kumpri promesa hodi implementa programa prioritáriu bainhira manán iha eleisaun parlamentár 2023.
“Ohin, loron ida ne’ebé importante tebes, tanba povu deside sira nia destinu. Eleisaun ida ne’e, hanesan instrumentu ida hodi delega no fó poder ba partidu sira”, Avelino Coelho dehan ba Tatoli, hafoin exerse nia direitu votu, iha sede Suku Bemori, domingu ne’e.
Nia rekorda katak povu fó fiar ona durante tinan lima ba partidu lubuk ida hodi reprezenta povu ba iha Parlamentu Nasionál.
“Agora, povu mak husu fali ba nia-aan. Tinan lima, sira halo ona saída ba dezenvolvimentu rai ida ne’e. No ohin povu exerse nia direitu dala ida tan atu fo nia votu ba partidu ida ne’ebé mak oras ne’e dadaun iha Parlamentu ka partidu seluk fali”, nia esplika
Tuir Prezidente PST, kada tinan lima iha eleisaun parlamentár, partidu sempre aprezenta ninia programa prioritáriu hodi rezolve problema povo-nian, partidu balun solusiona problema dezempregu liuhusi haruka timoroan ba servisu iha rai liur no se karik povu konkorda ho solusaun ida ne’e bele vota ba sira.
Avelino Coelho realsa katak se Estadu iha osan kria kampu traballu iha rai-laran liuhusi Fundu Agrikultura, atu fó subsídiu no kriasaun brigada tékniku profisionál agríkola atu joven sira atu garante servisu iha rai-laran no sai-na’in ba sira nia plantasaun.
“Ne’e mós hanesan opsaun alternativa ba kriasaun empregu. Agora depende ba povu, se povu vota ba PST, no manán iha asentu parlamentár mak PST sei korente ho nia programa no kumpri nia programa”, nia subliña.
Tuir dadus husi Sekretariadu Tékniku Administrasaun Eleitorál (STAE), suku Bemori, postu administrativo Nain-Feto, munisípiu Dili, rejista eleitorál hamutuk 3.637 no sentru votasaun tolu.
Jornalista: Domingos Piedade Freitas
Editora: Isaura Lemos de Deus
