STAE Baucau hahú hala’o apuramentu munisipál
BAUCAU, 21 maiu 2023 (TATOLI) – Sekretariadu Tékniku Administrasaun Eleitorál (STAE), Munisípiu Baucau hahú ona hala’o apuramentu hafoin akta hosi sentru votasaun lima tama iha salaun apuramentu Vila Nova.
Diretór STAE Baucau, Natividade Freitas Guterres, esplika, akta ne’ebé submete ona iha STAE Baucau purvoilta oras 18:00, komposta hosi sentru votasaun EBC Uatu-wa, EBC Maucale, sentru komunitára lian Uaimanu-boe, EBF Lutumutu, Lieboru Baha, sede suku Uatulari, EBF Bahasa’e, sede suku Seiçal, EBF Seiçal, sentru komunitária aldeia Tasi, ensinu sekundária Santo António Baucau.
“Fatin ba apuramentu ita preparadu ona, tuir lei sentru votasaun lima tama ita hahú halao ona apuramentu,” Diretór STAE Baucau informa ba Agência TATOLI iha Vila Nova, dumingu ne’e.
Munisípiu Baucau rejista totál akta atu halo apuramentu munisipál 150 hosi sentru votasaun 150 inklui estasaun votu 180.
Nune’e, apuramentu munisipál iha STAE Baucau hahú realiza iha oras 20:10 kalan no tuir planu sei hala’o durante oras 48, hahú hosi loron 21 termina iha loron 24 fulan-maiu, maibé sei bele finaliza lais liu tuir situasaun no kondisaun durante prosesu apuramentu.
Provizóriu totál akta ne’ebé dijita ona hamutuk akta neen, no seidauk dijita akta 144 ho persentajen kontajen haat hosi eleitór 99.158.
Rezultadu tabulasaun munisípiu Baucau provizoriumente partidu polítiku ho númeru sorteiu 11 FRETILIN mak lidera dahuluk ho tótal 653, tuir kedas CNRT ho tótal votu 571 no PLP 372.
Partidu seluk hanesan PDN tótal votu 3, PLPA 15, PD 134, KHUNTO 94, PVT 30, UDT 3, PUDD 239, UNDERTIM 0, CASDT 7, MLPM 3, PST 13, PDC 1 no APMT 5
Jornalista : Natalino Belo
Editór : Evaristo Soares Martins
