COVALIMA, 21 maiu 2023 (TATOLI)—Sekretaradu Tékniku Administrasaun Eleitorál (TAE) Covalima hahú hala’o apuramentu munisipál, hafoin simu akta hosi sentru votasaun kuaze tuku 20h00 kalan.
“Tuir lei, akta lima tama ona hosi sentru votasaun, ita hahú hala’o apuramentu munisipal ne’ebé hahú uluk ho sentru votasaun hosi Eskola Bázika Loqeiu hosi postu administrativu Suai, munisípiu Covalima,” Diretór STAE Covalima, Francisco Gusmão, hateten bainhira hahú hala’o apuramentu iha salaun STAE Covalima, domingu ne’e
Tuir lei, nia dehan, STAE hahú hala’o apuramentu munisipál bainhira simu akta lima hosi sentru votasaun sira hanesan sentru votasaun Loqueu Foho, Wee-Boot, Halik, Fatuk-Oan no Bonuk.
Durante prosesu apuramentu munisipál, daudaun ne’e maiória akta hosi sentru votasaun tama ona iha STAE Covalima hodi halo apuramentu munisipál.
Iha prosesu apuramentu munisipál ne’e, hetan seguransa másimu hosi Polísia Nasionál Timor-Leste (PNTL) Covalima.
Tuir observasaun hosi Agência Tatoli observa katak, prosesu apuramentu munisipál ne’e hala’o hosi Komisaun Nasionál Eleisaun (CNE-sigla portugés), fiskál partidu polítiku no observa hosi observadór Caucus no Renetil.
Tuir dadus ba eleisaun parlamentar tinan ne’e, Sekretáriu Tékniku Administrasaun Eleitorál (STAE) Covalima estabelese sentru votasaun 100 no estasaun votasaun 120 iha munisípiu Covalima.
Sekretáriu Tékniku Administrasaun Eleitorál (STAE) Covalima rejista eleitór elizivél iha munisípiu Covalima hamutuk na’in-49.436 ne’ebé ezerse sira-nia direitu votu iha eleisaun parlamentár ne’ebé sei realiza iha 21 maiu 2023.
Eleitór na’in-49.436 ne’e kompostu hosi mane hamutuk 2.5220 no feto ema na’in-2.4216, no eleitór foun na’in-942 ne’ebé kompostu hosi mane hamutuk 476 no feto na’in-466, nune’e eleitór atualizadu 1830 kompostu hosi mane 1.016 no feto 814.
Ho nune’e, STAE mós rejista eleitór ne’ebé mate iha munisípiu Covalima, hamutuk na’in-353 ne’e kompostu hosi mane 186 no feto 167.
Entertantu, bazeia ba dadus iha tinan 2022 STAE Covalima rejista eleitór elizivél hamutuk 4.8830 kompostu hosi mane 2.4950 no feto 2.3880.
Jornalista : Celestina Teles
Editór : Cancio Ximenes
