DILI, 21 maiu 2023 (TATOLI)—Atuál Primeiru-Ministru (PM) no hanesan mós Prezidente Partidu Libertasaun Populár (PLP), Taur Matan Ruak, hateten prontu simu desizaun no rezultadu saida de’it mak povu fó iha eleisaun parlamentár 2023.
“Ha’u kontente ho ida ne’ebé mak povu fó ba ha’u. Konserteza la’ós ona kadeira ualu maibé ha’u kontente númeru kadeira ne’ebé de’it sira fó ha’u no agradese barak ba konfiansa,” Prezidente PLP, Taur Matan Ruak, hateten ba jornalista sira hafoin ezerse nia direitu votu iha sentru votasaun eskola primária aldeia 17 abríl, suku Metiaut, postu administrativu Kristu Rei, munisípiu Dili, domingu ne’e.
Atuál PM ne’e apela ba povu tomak atu nafatin kria pás no estabilidade ba rezultadu saida de’it mak mosu iha eleisaun lejislativa ne’e.
“Oportunidade mai dala-ida, la mai dala-rua. Ha’u espera katak povu hatene aproveita oportunidade ba sira-nia benefísiu no dezenvolvimentu no dezenvolvimentu sira-nia família, komunidade no sira-nia nasaun,” nia hateten.
Partidu PLP nafatin kompromote bainhira hetan fiar hosi povu iha eleisaun ne’e ba ka’er ukun, iha governasaun tuir mai mak sei realiza kompromisu ne’ebé hato’o ona iha kampaña eleitorál hanesan kombate má-nutrisaun ho programa sira seluk tan.
Jornalista : Nelson de Sousa
Editór : Cancio Ximenes
