UDT submete ba desizaun povu nian
DILI, 21 maiu 2023 (TATOLI) – Sekretáriu-Jerál Partidu Uniaun Demokrátika Timorense (UDT), Nikson Madeira Lay, husu ba militante no simpatizante sira atu respeita desizaun povu nian iha eleisaun parlamentár ne’e.
“Ami respeita tebes desizaun ne’ebé povu halo iha rezultadu orsida, tanba sira mak deside liuhusi votasaun. Ami garante katak sei hetan mós asentu parlamentár, maibé kuandu ida ne’e la sai realidade nafatin respeita desizaun sira ne’e”, Nikson Lay dehna hafoin ezerse ninia diretu iha sentru votasaun iha Eskola Bázika Filiál, Vila Verde.
Nia saliena ema ida-idak iha responsabilidade nu’udar sidadaun ne’ebé di’ak atu hamutuk hodi bele hametin pás no estabilidade, nune’e bele lori eleisaun parlamentár ne’e la’o ho hakmatek.
“Kualkér desizaun ne’ebé sei mosu hanesan partidu polítiku ida prontu simu, tanba ne’e julgamentu povu nian no tenke hakruuk ba desizaun ne’ebé povu halo”, nia afirma.
UDT nafatin tau esperansa ba eleisaun ne’e, tanba durante tinan 49 ninia laran partidu eziste, iha eleisaun parlamentár tinan ida ne’e sei hetan asentu iha Parlamentu.
Jornalista: Tomé Amado
Editora: Maria Auxiliadora
