DILI, 21 maiu 2023 (TATOLI)—Votante sira hanesan funsionáriu no família pasiente iha Hospital Nasional Guido Valadares (HNGV) hamutuk 604 ezerse ona sira-nia direitu iha HNGV.
“Ami submete lista família pasiente ba STAE ne’e hamutuk 204 depois lista funsionáriu HNGV ne’ebé mak submete hamutuk 400 entaun totál hamutuk 604. Ami submete lista ikus ba iha STAE ne’e iha loron 11 maiu, entaun pasiente balun alta, no balun mate, entaun sira ne’ebé mak sei ezerse ona sira-nia nia direitu iha ne’e ,” Koordenadór Ekipa Preparasaun Elisaun Parlamentár ba tinan 2023 iha HNGV, Miguel Guterres, informa, ba jornalista iha HNGV, ohin.
Nia dehan, HNGV hasoru hela problema tanba pasiente ne’ebé mak tama iha loron 12 mai leten labele vota tanba tuir lei katak naran ne’ebé mak iha bazeia ba lista HNGV haruka ba STAE.
“Problema ida ami hasoru mak ne’e, iha loron 11 ami hatama lista ikus ba STAE, no ami nafatin kontaktu ho STAE, tanba ita hatene katak, ospitál ne’e movimentu 24 oras tama sai no pasiente ne’ebé mak tama iha loron 12 mai leten bele vota kalae, maibé STAE informa ba ami katak, STAE nia servisu bazeia ba lei, ne’ebé tuir lei eleitorál lista sira ne’e submete mak bele vota ,” nia esplika.
Iha fatin hanesan, pasiente, Joaquim Martinho Lopes kontente tanba vota ona iha Hospitál Nasionál Guido Valadares (HNGV).
“Ha’u-nia esperansa ba Governu ne’ebé mak ukun tenke ukun ho di’ak, presiza kria kampu traballu barak ba joven sira no mós tau matan ba iha setór sira ne’ebé mak importante hodi nune’e ita nia dezenvolvimentu ne’e bele lao ho diak ” Joaquim Martinho Lopes afirma.
Tuir observasaun TATOLI katak pasiente ho familia hahú vota iha sira-nia fatin baixa iha HNGV depois parte husi STAE no Brigada sira lori tuir boletim votu ba sira-nia fatin hodi ezerse sira-nia nia direitu.
Alende ne’e pasiente ne’ebé mak labele hader no labele la’o, sira nafatin toba iha sira-nia kama, mak nia familia ka oan ne’ebé hein ajuda vota, antes atu vota famiylia fó boletim votu ba pasiente ne’e hatudu no hakarak vota ba se mak, hafoin familia ajuda vota hela.
Jornalista : Felicidade Ximenes Editór: Rafael Ximenes de A. Belo
