Votante iha Taroman entuziasmu ezerse direitu votu
COVALIMA, 21 maiu 2023 (TATOLI)—Xefe suku Taroman, postu administrative Fatululik, munisípiu Covalima, Leonel Asa, hateten votante iha suku Taroman entuziasmu ezerse sira-nia direitu vota iha sentru votasaun iha eleisaun parlamentár 21 maiu 2023.
“Ohin, votante sira kabesik ona sentru votasaun hodi ezerse direitu votu sira, nune’e partridu ne’ebé manán bele forma governu foun atu hala’o dezenvolvimentu,” Xefe suku Taroman, Leonel Asa, hateten ba Agéncia Tatoli, iha sentru votasaun Eskola Ensinu Báziku Filiál Taroman, domingu ne’e.
Autoridade lokál ne’e husu atu kontinua hala’o dezenvolvimentu hanesan hadi’a estrada iha suku Taroman, postu Fatululik.
Nia dehan, votante sira iha ona konxiénsia hosi ezerse direitu votu iha sentru votasaun ho hakmatek, maske durante fulan ida-nia laran hala’o kampaña polítika iha ida-idak nia partidu.
Tuir observasaun hosi Agéncia Tatoli durante votante sira ezerse direitu votu ne’e observa hosi observadòr internasionál no nasionál, fiskál partidu sira no hetan seguransa hosi Unidade Polisia Fronteira.
Jornalista : Celestina Teles
Editòr : Cancio Ximenes
