Votante internadu ezerse ona votu iha HorEX Baucau
BAUCAU, 21 maiu 2023 (TATOLI) – Votante internadu komposta hosi pasiente, família no profisionál saúde ezerse ona votu iha Ospitál Rejionál Eduardo Ximenes (HorEX, sigla portugés) Baucau.
Xefe departamentu rekursu umanu HorEX Baucau, Sebastião Amaral, esplika, eleitór iha HorEX hamutuk 344 bazea ba lista ne’ebé antes ne’e submete ba STAE iha loron 10 maiu, komposta hosi hosi profisionál saúde na’in-276 no pasiente inklui família hamutuk na’in-68.
“Hosi na’in-68 barak mak la vota tanba alta ona liuliu pasiente no família ne’ebé baixa iha ospitál,” Diretór STAE Baucau hateten iha Vila Nova, kinta ne’e.
Maske nune’e, durante eleisaun mosu nafatin protestu hosi funsionáriu sira inklui pasiente balun tanba naran la submete ba STAE Baucau antes loron sanulu realizasaun eleisaun.
Alende ne’e iha mos lista naran no nùmeru kartaun eleitorál sala hamutuk na’in-tolu maibé konsege ezerse votu tanba hetan autorizasaun hosi STAE Baucau.
Desizaun refefe bazea ba dekretu governu númeru 10/2020 artigu 1 kona-ba ámbitu aplikasaun katak bainhira lista naran eleitór (internadu) submete ba STAE loron-sanulu antes eleisaun.
Durante votasaun fahé ba fatin rua hanesan funsionáriu sira vota iha árreadór ospitál. Enkuantu pasiente nia família sira ekipa téknikuu direitamente lori tuir urna ba fatin toba.
HorEX Baucau parte hosi sentru votasaun Ensinu Báziku Sentrál Tirilolo, nune’e bainhira hahú eleisaun sei kontinua kedas ba estasaun votu iha ospitál atu votante internadu sira ezerse direitu.
Jornalista : Natalino Belo
Editór : Evaristo Soares Martins
