DILI, 21 maiu 2023 (TATOLI)— Lider Karismátiku, José Alexandre Kayrala Xanana Gusmão kestiona ho kualidade tinta indelevél ba Eleisaun Parlamentár (ElPar) tinan 2023.
“Sosa tiha ona agora tinta hanesan ne’e, ne’e CNE (Komisaun Nasional ba Eleisaun) favor ida ita presiza hadia tanba buat ne’e ladun diak falta responsabilidade ba povu no ba rai ida ne’e, to’o dehan eleisaun ohin buat ne’e mosu,” Xanana Gusmão dehan ba jornalista sira hafoin ezerse votu iha Sentru Votasaun Sede Suku Balibar, domingu ne’e.
Lider Karismátiku ne’e mós husu ba Prezidente Republika, José Ramos Horta hodi bele tau atensaun inklui CNE rasik no Sekretariadu Tékniku Administrasaun Eleitoral (STAE).
Antes ne’e, STAE ho CNE inklui Partidu Politiku sira iha loron 30 marsu 2023 halo ona teste konfirmasaun tinta indelevél ba ElPar tinan 2023.
Governu tau osan no UNDP (Programa das Nações Unidas para o Desenvolvimento) administra nia konteúdu oinsá mak bele sosa, nune’e konprova ona no liuhosi teste oioin katak fase ho bee-manas, fase ho sabaun, fase ho gazolina, fase ho bayclin maibé tinta nafatin iha liman fuan.
Tinta indelevél hosi STAE ho CNE no partidu politiku sira ho apoiu hosi UNDP, ne’ebé aloka orsamentu $360,000 hodi sosa tinta eleitorál.
Teste dahuluk konfirma 25% hosi Nitrat osan- mutin ne’ebé presiza iha tinta, tanba tinta iha liman fuan ne’ebé hetan teste durante oras 72 nia laran mak bele hodi hasai ho bee, sabaun, tua, liquida mutin no hamoos tinta liman kukun nian.
STAE ho UNDP antes ne’e komprova noda tinta iha liman ne’e bele haree momoos iha liman-fuan, tuir padraun internasionál no projetu UNDP CORE-TL asegura eleisaun informadu no inkluzivu liuhosi apoiu ba prosesu eleitorál.
Porsesu konfirmasaun tinta indelevél ne’e, reprezentante partidu polítika hanesan CNRT, PD, PST no KHUNTO no mós STAE, CNE no UNDP halo teste ba liman no hatudu tinta kualidade no kór la sai.
Jornalista : Cidalia Fátima
Editora : Armandina Moniz
