ERMERA, 22 maiu 2023 (TATOLI) – Rezultadu apuramentu Eleisaun Parlamentár periodu 2023-2028 iha munisípiu Ermera hatudu katak Partido Congresso Nacional da Reconstrução Timorense (CNRT) manan maioria ho votu hamutuk 34, 762 ka (51.05 %).
Hafoin CNRT, partidu Frente Revolucionária de Timor-Leste Independente (FRETILIN)okupa fatin daruak ho votu hamutuk 13, 530 ka (19.87%), tuir kedas ho Partidu Demokrátiku nu’udár terseiru lugár ho votu 6,295 ka (9,24%), no partidu KHUNTO hetan votu hamutuk 4,142 ka (6.08%), Partidu Libertação Populár akumula votu 2,652 ka (3,89%, Partido Os Verdes de Timor (PVT) hetan votu 1,976 (2,90%), Partidu Asosiasaun Populár Monarkia Timorense (APMT) ho votu 1,694 (2,49%), no Partidu Unidade e Dezenvolvimentu Demokrátiku (PUDD) hetan votu 1,077 ka (1,58%).
Enkuantu, partidu sira seluk hetan votu lato’o 1,000 hanesan Centro Acão Social Democrata Timorense (CASDT) hetan votu 457 (0,67%), Partidu Sosialista Timor (PST) ho votu 411 (0,60%), Partido Liberta Povu Aileba ho votu 307 (0,45%), Partido Democrata Cristão (PDC) ho votu 194 (0.28%), Partidu Republikanu ho votu 166 (0,24%), Partidu Unidade Nasional Demokratika Resistensia Timorense (UNDERTIM) ho votu 134 (0,20%), Partidu União Democratico Timorense ho votu 134 (0,20%), partidu Movimentu Popular de Libertação Maubere (MPLM) ho votu 87 (0,13%), no Partidu Dezenvolvimentu Nasional (PDN) ho votu 80 (0,12%).
Entertantu, STAE rejista totál eleitór munisípiu Ermera hamutuk 85,358, no husi eleitór sira ne’e, nain 69,424 (81,33%) mak ezerse sira-nia direitu hodi vota iha eleisaun parlamentár ne’e.
Durante kontazen votus, STAE Ermera rejista votu nulu hamutuk 1023 (1,47%), votu branku hamutuk 290 (0,42%), no votu reklamadu 10 no votu rezeitadu rua.
Durante Eleisaun, situasaun jerál iha Munisípiu Ermera lao hakmate no kontroladu tanba hetan seguransa máxima husi Polísia Nasionál Timor-Leste (PNTL), no Forsa Defeza Timor-Leste (FDTL).
Komandu PNTL Munisípiu Ermera, Justino Menezes, Superintendente Xefe, hatoo katak PNTL munisípiu Ermera komesa kedas fó seguransa máximu ba prosesu eleisaun tomak iha Ermera hahu husi distribuisaun material sensitivu ba sentru votasaun 140 iha Ermera laran tomak.
Diretór CNE Munisípiu Ermera, Napoleão Vieira Soares informa durante eleisaun, CNE la rejista insidente ruma no buat hotu lao di’ak.
Napoleão dehan parte tékniku, prosesu eleisaun tomak iha Munisípiu Ermera lao ho di’ak no trankuilu: “To’o agora ita sedauk simu informasaun ka keixa ruma kona-ba iregularidade ruma.”
Diretór STAE Munisípiu Ermera, Eduardo Casimiro de Deus hato’o ninia agradesimentu ba parte hotu ne’ebé mak kontribui makas ba prosesu eleisaun tomak iha Munisípiu Ermera lao ho diak no hakmatek.
“Agradese ba koopersaun tomak hahu husi distribuisaun matérial sira to apuramentu munisipál hotu lao ho di’ak. Obrigado uain ba ema hotu nia kontribuisaun,” Eduardo konklui.
Jornalista: Filomeno Martins
Editora: Nelia Borges
