ERMERA, 22 maiu 2023 (TATOLI) – Situasaun iha Munisípiu Ermera lao hakmate no kontroladu durante peiordu eleisaun parlamentár tanba hetan seguransa máxima husi Polísia Nasionál Timor-Leste (PNTL), no Forsa Defeza Timor-Leste (FDTL).
Komandu PNTL Munisípiu Ermera, Justino Menezes, Superintendente Xefe, hatoo katak PNTL munisípiu Ermera komesa kedas fó seguransa máximu ba prosesu eleisaun tomak iha Ermera, hahu husi distribuisaun matérial sensitivus ba sentru votasaun 140 iha Ermera.
“Deslokasaun ofísial PNTL ba kada sentru votasaun hahu iha dia 20 maiu, no iha 21 maiu, ita fó seguransa ba prosesu eleisaun tomak. Situasaun kontroladu iha sentru 140,” Justino ba Tatoli, iha fatin apuramentu munisipál, Glenu, munisípiu Ermera, segunda ne’e.
Justino dehan situasaun seguransa lao hakamatek hahu husi tuku 7 dader to kontazen votu suku hotu: “Tuku 6 lorokraik, ita hahu akompaña deslokasaun materiais eleisaun mai fali STAE munisípiu Ermera.”
Komandante ne’e informa katak PNTL hetan apoiu makaas husi FDTL no Unidade Espesial Polísia (UEP), tanba ne’e situasaun seguransa lao hakmatek durante eleisaun iha Ermera.
Justino akresenta PNTL sei kontinua fó seguransa durante prosesu apuramentu munisipál tomak no sei akompaña materiais eleisaun ba Komisaun Nasionál Eleisaun (CNE), iha Dili.
“Hau fó ona orientasaun ba membru PNTL sira hotu ne’ebé mak fila husi sentru votasaun sira atu reforsa nafatin Skuadra PNTL nian iha Ermera laran tomak. Hasa’e volume patrollamentu, inklui patrolla lao-ain, patrulla ho motor no kareta,” nia dehan.
Iha fatin hanesan, Diretór CNE Munisípiu Ermera, Napoleão Vieira Soares relata tuir nia observasaun katak, durante eleisaun iha Munisípiu Ermera, buat hotu lao di’ak.
Entertantu apuramentu munisipál lao dadaun maibé STAE no CNE mós hasoru difikuldade ho Internet.
“Tuir oráriu, durante oras 48 nia laran ne’e apuramentu munisipál tenke hotu, maibé problema ita hasoru iha ne’e mak liña internet tun hela de’it. Entaun, halo prosesu apuramentu munsipál ne’e bele konklui fali iha loron tuir mai. Iha munisípiu balun nian konta hotu ona tanba internet di’ak, maibé iha Ermera ne’e, problema rede mak halo prosesu apuramentu ne’e demora uitoan,” nia dehan.
Napoleão dehan ein termu tékniku, prosesu eleisaun tomak iha Munisípiu Ermera lao ho di’ak no trankuilu: “To’o agora ita sedauk simu informasaun ka keixa ruma kona-ba iregularidade ruma.”
Jornalista: Filomeno Martins
Editora: Nelia Borges
