Autoridade Covalima agradese ba PNTL garante seguransa iha Elpar 2023
COVALIMA, 23 maiu 2023 (TATOLI)—Sekretáriu Administradór Munisípiu Covalima, Francisco de Jesus Alves, hato’o votu agradesimementu ba Polísia Nasionál Timor-Leste tanba garante seguransa durante prosesu hala’o eleisaun parlamentár iha munisípiu Covalima ho pás no estabilidade.
“Ha’u hato’o agradese ba ita-nia Komandu PNTL Munisípiu Covalima maske ho limitasaun pesoál seguransa atu fó seguransa iha sentru votasaun sira, maibé ho estratéjia hosi ita-nia komandante PNTL ultra pasa ho situasaun ho hakmatek iha pás nia laran konsege ramata prosesu eleisaun ho di’ak iha pás no estabilidade iha Covalima,” Francisco de Jesus Alves hateten liuhosi nia diskursu iha salaun STAE Covalima, Kampung Baru, tersa ne’e.
Aleinde ne’e, nia hato’o mós votu agradesimentu ba partidu polítiku sira-ne’ebé durante kapaña eleitorál to’o loron eleisaun 21 maiu 2023 no apuramentu munisipál, ne’ebé kontibui ba pás no estabilidade iha munisípiu Covalima.
“Hanesan ema Covalima-oan ita sempre fó liman ba malu hodi finaliza prosesu eleisaun ho susesu hakarak hato’o ba funsionáriu STAE no CNE hala’o eleisaun ho susesu, tanba ne’e tenke kontinua mantein servisu ne’e. Iha tinan ne’e, ita sei hala’o eleisaun ba xefe suku sira iha fulan novembru,” nia dehan.
Ho nune’e, nia mós rekomenda ba Diretór Komisaun Nasionál Eleisaun (CNE-sigla Portugés) no Diretór Sekretáriu Tékniku Administrasaun Eleitorál nafatin fó atensaun ba brigada no ofisiál Supervizaun Eleisaun ne’ebé dedika sira-nia aan ba servisu ida-ne’e, nune’e nafatin envolve sira iha prosesu eleisaun atu hili xefe suku sira.
“Ha’u rekomenda ba Diretór CNE-STAE, ba futuru organiza eleisaun nafatin atu haree alin sira- ne’e dedika nia aan ba prosesu ida-ne’e hanesan fó kondekorasaun ba sira atu envolve nafatin iha prosesu hirak ne’e, tanba iha ona esperiénsia no hakarak servisu ba ita-nia munisípiu,” nia hateten.
CNE-STAE hala’o koordenasaun di’ak
Entretantu, Komisáriu CNE destakadu Aileu no Covalima, Carlito Martins, senate kontente tanba órgaun Eleitorál hanesan Komisaun Nasionál Eleisaun (CNE-sigla portugés) no Sekretariadu Tékniku Administrasaun Eleitorál (STAE) hala’o koordenasaun di’ak ho entidade sira iha munisípiu Covalima.
“Ha’u hanesan komisáriu destakadu Covalima-Aileu sente orgullu tanba órgaun Administrasaun rua, destaka iha Covalima halo koordenasaun di’ak ho partidu polítiku sira no entidade hotu iha Covalima, nune’e servisu la’o di’ak,” nia dehan.
Ho koordenasaun servisu ne’ebé di’ak, nia dehan, ohin-loron hatudu nia rezultadu tanba hosi prosesu realiza eleisaun la’o ho ambiénte tranquilidade, pás, amizade no dame iha munisípiu Covalima, maske sidadaun balun hasai linguajen balun kro’at maibé la’os agresaun fíziku.
Aleinde CNE mós orgullu ba prezensa autoridade seguransa hahú hosi preprasaun ba eleisaun to’o eleisaun ramata ho ambiénte hakmatek.
Entretantu, rezultadu tabulasaun munisípiu Covalima partidu polítiku ho númeru sorteiu 12 lidera ho votu 16,155 (40,26%), tuir kedas FRETILIN ho votu 7,211 (17,97%), PD ho votu 6,567 (16,37%), PLP ho votu 4132 (10,30%).
Enkuantu, partidu KHUNTO ho votu 2,770 (6,90%), PUDD ho votu 1,648 (4,11%), PVT ho votu 803 (2,00%), PLPA ho votu 171 (0,43%), CASDT ho votu 137 (0,33%), PST ho votu 118 (0,29%), APMT ho votu 97 (0,24%), PR ho votu 73 (0,18%), MPLM ho votu 66 (0,16%), PDC ho votu 54 (0,13%), partidu UNDERTIM ho votu 48 (0,12%), partidu UDT 45 (0,11%) no PDN ho votu 32 (0,08%).
Entertantu, tuir dadus hosi STAE votante ne’ebé ezerse direitu votu iha eleisaun parlamentár hamutuk 40.786 hosi totál eleitór rejistadu 49.299 ho totál votu válidu 40.124, nune’e taxa partisipasaun eleitór iha Covalima atinje 82,73%.
Jornalista : Celestina Teles
Editór : Cancio Ximenes
