Bankada FRETILIN-KHUNTO kongratula CNRT
DILI, 23 maiu 2023 (TATOLI)—Xefe Bankada FRETILIN iha Parlamentu Nasionál (PN), Deputadu David Dias Ximenes ‘Mandati’, lori bankada nia naran kongratula vitória partidu CNRT iha eleisaun parlamentár 2023.
Notísia Relevante: Rezultadu finál provizoriu: CNRT hetan kadeira 31, PLP kadeira haat
“Ami mós lori bankada FRETILIN nia naran kongratula vitória ne’ebé CNRT hetan, simu no respeita desizaun povu nian,” Xefe Bankada FRETILIN ne’e hato’o liuhosi reuniaun plenária PN, tersa ne’e.
Aleinde ne’e, Xefe Bankada KHUNTO, Olinda Guterres, mós kongratula vitória CNRT iha eleisaun parlamentár.
“Ha’u nu’udar Xefe Bankada KHUNTO iha Parlamentu Nasionál ida-ne’e, hakarak hato’o ami-nia parabéns ba partidu CNRT, no babain kedas ha’u dehan iha PN ida-ne’e katak ita labele hateke malu no hafuhu malu maibé hadomi malu,” nia hateten.
Nia dehan, ba KHUNTO sé de’it mak atu manán, KHUNTO apoiu no importante timoroan mak sai Primeiru-Ministru, labele rai seluk nia oan mak sa’e no ka’er kargu ne’e.
“Satán ita-nia Maun Boot Xanana ne’ebé ita hotu dehan aman ba nasaun, karik iha buat ruma iha tinan lima nia laran la loos mak povu mós hili loos, atu nune’e povu nia moris bele hadi’a no kadoras bele dada mai Timor,” nia dehan.
Nia espera katak, Xanana Gusmão assume kargu nu’udar Primeiru-Ministru ne’e bele dada kadoras Greater Sunrise mai Timor-Leste.
Jornalista : Nelson de Sousa
Editór : Cancio Ximenes
