CNRT manán iha Bobonaro ho votu 25.199
MALIANA, 23 maiu 2023 (TATOLI) – Partidu Kongresu Nasionál Rekonstrusaun Timorense (CNRT) lidera kontajen votu iha apuramentu munisípiu Bobonaro ho votu hamutuk 25.199.
Sekretariadu Tékniku Administrasaun Eletorál munisípiu Bobonaro, tersa ne’e, finaliza hala’o apuramentu munisipál ne’ebé hahú halo verifikasaun akta iha loron-domingu tuku 07:00 kalan ne’ebé finaliza tersa tuku 11:48 otl, ho nia rezultadu hatudu partidu CNRT ho númeru sorteiu 12 mak lidera ho 42,96%.
Ho nune’e, rezultadu tabulasaun munisípiu Bobonaro partidu polítiku ho númeru sorteiu 12 lidera dahuluk ho votu 25.199 (42,96), tuir kedas FRETILIN ho votu 11.949 (20,37%), PD ho votu 6.399 (10,91), KHUNTO ho votu 5.743 (9,79%), PLP ho votu 2.303 (3,93%).
Enkuantu PUDD 1.993 (3,93%), PVT 1.753 (2,99%), APMT 864 (1,47%), PLPA 296 (0,50%), CASDT 256 (0,45%), PST 192 (0,19%), PR 150 (0,26), PDC 112 (0,19%), UDT 100 (0,17%), UNDERTIM 80 (0,14%), PDN 49 (0,08%) no MPLM ho votu 48 (0,08%).
Munisípiu Bobonaro totál akta hamutuk 150 ho estasaun votasaun 179 ne’ebé konklui ona halo apuramentu munisipál.
Tuir observasaun Agência Tatoli nota katak, durante prosesu apuramentu munisipál hetan supervizaun hosi Komisaun Nasionál Eleisaun (CNE-sigla portugés), fiskál partidu polítiku sira, Provedoria Direitu Umanu no Justisa (PDHJ) no observa hosi observadór OIPAS, Caucus no hetan seguransa másimu hosi Polísia Nasionál Timor-Leste (PNTL) Bobonaro.
Tuir planu, iha tuku 02:00 fulan-maiu tinan 2023, Sekretariadu Tékniku Administrasaun Eleitorál (STAE ) munisípiu Bobonaro no CNE akompañadu hosi PNTL sei lori rezultadu apuramentu munisípiu Bobonaro ba nasionál.
Jornalista : Sérgio da Cruz
Editór : Evaristo Soares Martins
