CNRT manán iha Covalima ho votu 16.155
COVALIMA, 22 maiu 2023 (TATOLI)—Partidu Kongresu Nasionál Rekonstrusaun Timor-Leste (CNRT) lidera kontajen votu iha apuramentu munisípiu Covalima hodi halibur votu hamutuk 16.155.
Sekretáriu Tékniku Administrasaun Eletorál munisípiu Covalima, segunda ne’e, finaliza hala’o apuramentu munisípal ne’ebe hahú halo verfikasaun akta iha tuku 21h00 kalan ne’ebé finaliza iha 23h12 kalan, ho nia rezultadu hatudu partidu CNRT ho númeru sorteiu 12 mak lidera ho 40,26%.
Ho nune’e, rezultadu tabulasaun munisípiu Covalima partidu polítiku ho númeru sorteiu 12 lidera dahuluk ho votu 16,155 (40,26%), tuir kedas FRETILIN ho votu 7,211 (17,97%), PD ho votu 6,567 (16,37%), PLP ho votu 4132 (0,30%).
Enkuantu, partidu KHUNTO ho votu 2,770 (6,90%), PUDD ho votu 1,648 (4,11%), PVT ho votu 803 (2,00%), PLPA ho votu 171 (0,43%), CASDT ho votu 137 (0,33%), PST ho votu 118 (0,29%), APMT ho votu 97 (0,24%), PR ho votu 73 (0,18%), MPLM ho votu 66 (0,16%), PDC ho votu 54 (0,13%), UNDERTIM ho votu 48 (0,12%), UDT ho votu 45 (0,11%) no PDN ho votu 32 (0,08%).
Munisípiu Covalima totál akta hamutuk 100 ho estasaun votasaun 120 ne’ebé konklui ona halo apuramentu munisipál.
Tuir observasaun Agência Tatoli nota katak, durante prosesu apuramentu munisipál hetan supervizaun hosi Komisaun Nasionál Eleisaun (CNE-sigla portugés), Fiskál partidu polítiku sira, Provedoria Direitu Umanu no Justisa (PDHJ) no observa hosi observadór Oipas, Caucus no hetan Seguransa másimu hosi Polísia Nasionál Timor-Leste (PNTL) Covalima.
Tuir planu, iha loron 23 fulan-maiu tinan 2023, Sekretariadu Tékniku Administrasaun Eleitorál (STAE ) Covalima, akompañadu hosi PNTL sei lori rezultadu apuramentu munisípiu Covalima ba Nasionál.
STAE Covalima transporta rezultadu apuramentu ba nasionál
Entretantu, Sekretáriu Tékniku Administrasaun Eleitorál (STAE) Covalima transporta ona rezultadu urna sensitivu eleisaun parlamentár ba nasionál, hafoin finaliza apuramentu munisipál.
“Durante prosesu eleisaun ne’ebé Prezidente Repúblika dekreta loron eleisaun iha loron 21 fulan-maiu to’o ohin loron ne’ebé ita finaliza ona ita-nia servisu hanesan kontajen akta inisiál iha tuku hahú tuku 21h00 no ramata iha 00jh00 kalan, nune’e ohin transporta ona ba nasionál,” Diretór STAE Covalima, Francisco Gusmão, hato’o liuhusi nia diskursu, iha salaun STAE Covalima, Kampung Baru, tersa ne’e.
STAE transporta rezultadu apuramentu munisipál ba nasionál ne’ebé tau urna mak hanesan, akta rezultadu apuramentu ida (1), akta sentru votasaun 100, akta estasaun votasaun 120, akta eletróniku 100 no buletin reklamadu sia (9).
Hafoin finaliza kortajen votu apuramentu munisipál, diretór STAE mós hato’o agradesimentu ba autoridade lokál iha munisípiu Covalima hodi fó apoiu prosesu tomak realiza eleisaun iha Covalima.
“Apoiu hosi autoridade-sira ne’e, ita-nia atividade eleisaun realiza iha Covalima la’o ho di’ak tanba hetan apoiu másimu hosi seguransa, nune’e ita-nia komunidade no joven sira hakmatek durante prosesu eleisaun ne’e la’o to’o ramata,” nia dehan.
Iha Covalima, votu nulu hamutuk 519 (1,27%), votu branku 131 (0,32%), votu reklamadu 9 (0,02%), votu rezeitadu ida (1) no votante ne’ebé vota 40.786 hosi totál eleitór rejistu 49.299 ho totál votu válidu 40.124, nune’e taxa partisipasaun eleitór atinje 82,73%.
Jornalista : Celestina Teles
Editór : Cancio Ximenes
