Eleisaun parlamentár iha Covalima la’o hakmatek
COVALIMA, 23 maiu 2023 (TATOLI)—Komandante PNTL Munisípiu Covalima, Superintendente Polísia Basilio de Jesus hateten, durante prosesu realiza eleisaun parlamentár iha munisípiu Covalima situasaun la’o ho hakmatek.
“Ha’u fiar metin ha’u-nia konseptu, polísia sai autór ba seguransa. Ema Covalima hotu sai na’in ba seguransa, nune’e hosi na’in ba seguransa fó out put ba ita hodi hatudu rezultadu ohin tama loron tolu (3) apuramentu nivél munisípiu ne’ebé finaliza ona,” Komandante PNTL munisípiu Covalima, Superintendente Polísia Basilio de Jesus, hato’o liuhosi nia diskursu iha salaun STAE Covalima, Kampung Baru, tersa ne’e.
Eleisaun parlamentár hala’o iha loron 21 fulan-maiu hahú oras votasaun to’o tama iha faze kontajen, maske iha sentru votasaun balun iha konflitu la’ós ho fíziku maibé konflitu argumentu la sai kategória ameasa nune’e agora atu halo transportasaun ba nasionál.
“Ita susesu, ita hotu matenek, ita hotu nia kontribuisaun ida-ne’e, ita hotu sai-na’in ba Covalima no na’in ba Timor-Leste ida-ne’e, maske iha loron 20 fulan-maiu akompaña informasaun barak,” nia hateten
Timor-Leste independénsia tinan 21 ona, nune’e prontu ona atu hala’o funsaun ba eleisaun parlamentár hodi fó konfiansa ba seguransa, tanba polísia nafatin seguransa ho karáter alerta 01.
Nune’e, komandante munisípiu husu ba dirijente partidu polítiku fó formasaun ba militante partidu polítiku sira labele hamosu konflitu, nune’e bele hamenus konflitu iha baze.
“Ita hanesan dirijente partidu iha karáter fó edukasaun sívika ba ita-nia militante hotu, nune’e ita minimiza konflitu iha baze, tanba ita hotu sai na’in ba rai ida-ne’e maske diferensa ideolojia, nune’e mak ita bele kria pás hodi kria amizade maske mai hosi partidu la hanesan,” nia dehan.
Entretantu, iha eleisaun parlamentár tinan 2023, Komandu destaka seguransa ba sentru votasaun hanesan Unidade Espesiál Unidade Patrullamentu Fronteira (UPF), Unidade Polísia Marítima (UPM) no membru polísia Nasionál Timor-Leste iha komandu Munisípiu Covalima no forsa koordenasaun Falintil Forsa Defeza Timor-Leste (F-FDTL).
Jornalista : Celestina Teles
Editór : Cancio Ximenes
