DILI, 23 maiu 2023 (TATOLI) – Diretór Ezekutivu Servisu Autónomu Medikamentu Ekipamntu Saúde (SAMES), Santana Martins, informa daudaun ne’e estoke aimoruk iha armajen SAMES 25% mak mamuk.
“Ita-nia estoke aimoruk daudaun ne’e totál item hamutuk 1.646 husi ne’e estoke ne’ebé disponível hamutuk 1231 ka 75% no estoke ne’ebé mak mamuk hamutuk 415 ka 25%”, Santana Martins informa ba jornalista sira iha SAMES Kampu Alor, ohin.
Nia dehan, aimoruk sira ne’ebé estoke mamuk ne’e mak husi esensiál, vitál no nesesáriu sira ne’ebé mak durante uza barak iha fasilidade saúde sira.
“Estoke aimoruk sira ne’ebé daudaun iha SAMES ne’e, ita labele garantia no labele asegura estoke disponibilidade tuir polítika Governu nian ne’ebé mak hateten loloos ne’e ita tenke iha estoke 100% maibé menus husi ida ne’e ita-nia nesesidade de’it la sufisiente ona”, nia esplika.
Ho situasaun ida ne’e, atu informa ba publiku katak SAMES responde aimoruk ne’ebé iha, maibé ho kuantidade ne’ebé kiik, entaun SAMES lori aimoruk ne’e tuir orsamentu ne’ebé mak disponibilzadu.
“Ita kompras duni maibé nia estoke labele garante to’o fulan tolu ka neen ba oin, entaun ida ne’e mak problema ba SAMES prosesu aprovizionamentu ba kompra medikamentu diferente ho prosesu aprivizionamentu sira seluk, to’o ohin loron ita ezekuta duni prosesu aprovizionamentu sira maibé realizasaun ba pagamentu ne’e seidauk fiksu tanba prosesu aprovizionamentu ne’e normalmente mínimu fulan sia nia laran mak lori aimoruk sira ne’e mai iha rai-laran”, nia konklui.
Jornalista : Felicidade Ximenes
Editór : Zezito Silva
