DILI, 23 maiu 2023 (TATOLI) – Diresaun Nasionál Patrimóniu Lojístiku no Teknolojia (DNPLT) iha Ministériu Edukasaun, Juventude no Desportu (MEJD) distribui ona karteira eskolár hamutuk 18.817 ba eskola 292 iha territóriu.
Diretór Nasionál Patrimóniu Lojístiku no Teknolojia, Pedro dos Reis, afirma, tuir planu ministériu, eskola hamutuk 250 maka sei hetan karteira refere, liuliu estabelesimentu sira ne’ebé maka tama iha prosesu konstrusaun no reabilitasaun (PKR).
“Maibé haree filafali ba nesesidade eskola sira balun mós presiza, entaun daudaun iha eskola hamutuk 292 maka hetan ona apoiu karteira eskolár”, dehan Pedro Reis ba Tatoli iha Vila Verde, tersa ne’e.
Ministériu prevee iha tinan kotuk atu fornese karteira eskolár rihun 20 ba eskola sira ne’ebé presiza. Nune’e, entre loron 07 setembru 2022 no 22 maiu 2023, MEJD distribui ona karteira hamutuk 18.817 no falta 1.183 ne’ebé sei fahe iha semana ida ne’e.
Karteira eskolár ne’ebé DNPLT distribui ona ba eskola iha Aileu hamutuk 1.060 destina ba Edukasaun Pré-eskolár (EPE) rua, Eskola Bázika (EB) 12, Eskola Sekundária Tékniko-Vokasionál (ESTV) ida no Eskola Sekundária Jerál (ESG) rua.
Distribuisaun karteira 2.260 ba eskola 35 iha Ainaro destina ba EPE hitu, EB 22, ESTV haat no ESG rua. Ba Ataúro iha eskola rua ho totál karteira 160 distribui ba EB ida no ESG ida.
Nune’e mós eskola 30 iha Baucau hetan karteira eskolár 1.780 kompostu husi EPE tolu, EB 21, ESTV ida no ESG lima. Ba Bobonaro iha eskola 34 kompostu husi EPE rua, EB 29 no ESTV tolu.
Dili iha eskola 31 mak hetan karteira hamutuk 1.440, ne’ebé kompostu husi EPE ida, EB 13 , ESTV rua no ESG lima. Ermera iha eskola 27 ho totál karteira eskolár 1.910 distribui ba EPE rua, EB 22, ESTV rua no ESG tolu.
Covalima iha eskola 18 no hetan karteira 1.177, ne’ebé fahe ba EPE tolu, EB 13, ESTV ida no ESG ida. Eskola 18 iha Lautém hetan karteira hamutuk 1.365, husi ne’e fahe ba EPE haat, EB 14, ESTV rua no ESG rua.
Iha Liquiçá eskola 15 mak hetan karteira 1.070 – fahe ba EPE rua, EB sia, ESTV ida no ESG tolu. Iha Manufahi eskola hamutuk 22 mak hetan karteira 1.410 – EPE rua, EB 17, ESTV rua no ESG ida.
Manatuto iha eskola 16 no hetan karteira eskolár 1.010 – husi numeru ne’e fahe ba EPE lima, EB sia, ESTV rua no ESG rua. Eskola 29 iha Viqueque hetan karteira hamutuk 1.740 – EPE lima, EB 16, ESTV rua no eskola neen seluk.
“Totál karteira eskolár ne’ebé MEJD fahe ba munisípiu 13 kompostu husi EPE 38 ho total karteira eskolár 1.435, EB 198 ho totál karteira 12.492, ESTV 23 ho totál 2.240 no ESG iha 33 ho karteira eskola ne’ebé distribui ona hamutuk 2.650”, Pedro dos Reis realsa.
Jornalista: Tomé Amado
Editora: Maria Auxiliadora
