DILI, 23 maiu 2023 (TATOLI) – Diretór Nasionál Patrimóniu Lojístiku no Teknolojia, Pedro dos Reis, hatete empreza LAFAHEK mak sai manán-na’in ba konkursu públiku Ministériu Edukasaun, Juventude no Desportu (MEJD) hodi garante distribuisaun kombustivel iha fulan hitu, entre maiu no dezembru.
Diretór Pedro dos Reis hatete empreza refere sei asegura distribuisaun mina iha MEJD, tanba nia hanesan kompañia antigu ida ne’ebé mós antes ne’e hetan ona konfiansa husi Ministériu Edukasaun hodi fornese mina.
“Ha’u garante kompañia LAFAHEK ne’e sei hatudu ninia responsabilidade. Iha 2021, nia maka manán no agora iha 2023 hetan tan fali konfiansa ne’ebé maka nia fó ona iha tinan rua ba kotuk ne’e ho di’ak tebes”, dehan dirijente ne’e ba Tatoli, iha Vila Verde.
Nia haktuir konkursu públiku ne’ebé MEJD loke ba públiku ne’e iha empreza tolu maka kompete. Husi ne’e LAFAHEK maka prienxe rekizitu hodi sai vensedora ho totál despeza rihun $80-resin.
“Ita-nia obrigasaun maka kontinua buka meius atu atividade Ministériu Edukasaun labele paradu”, realsa.
Pedro dos Reis salienta katak empreza LAFAHEK iha ninia kapitál ne’ebé bele garante sustentabilidade atu apoia distribuisaun kombustivel ba kualkér fatin, tanba ne’e maka ministériu deside hodi fó konfiansa ba kompañia ne’e.
Notísia relevante: Distribuisaun karteira eskolár kontinua fali iha maiu tanba falta kombustivel
Jornalista: Tomé Amado
Editora: Maria Auxiliadora
