DILI, 23 maiu 2023 (TATOLI)—Membru Parlamentu Nasionál (PN) liuhosi Deputadu Bankada CNRT, Adérito Hugo, preokupa ho taxa partisipasaun eleitór tun iha eleisaun parlamentár iha loron 21 maiu 2023.
Nia dehan, períodu atu ba kampaña eleitorál nia parte preokupa tebes ona kona-ba kondisaun estrada iha área rurál ita atu konvida povu sira atu partisipa iha eleisaun hodi deside nasaun nia futuru.
“Ha’u hanoin tempu ne’e atu rezolve maibé to’o kampaña no eleisaun hotu povu mak iha responsabilidade morál no polítika ezerse sira-nia devér partisipa iha eleisaun. Maibé evidénsia hatudu mai ita katak partisipasaun tun, rejista eleitorál rihun 890-ital maibé sira-nia partisipasaun iha rihun 600. Númeru ida tun ne’e, tanba ita-nia inkapasidade no inkonsisténsia iha kompromisu ne’ebé ita halo katak serbi povu,” nia preokupa liuhosi reuniaun plenária PN, tersa ne’e.
Deputadu KHUNTO, Luís Roberto, parabeniza povu tomak hodi fó lejitimidade ba ukun na’in sira mezmu tinan 20 maiu, TL restaura indepedénsia hasoru nafatin kondisaun infraestrutura báziku ladi’ak, nune’e halo oinsá mak presiza hadi’a kondisaun sira-ne’e.
“Tanba, loos duni eventu foin daudaun eleisaun taxa partisipasaun ne’e tun, ida-ne’e hanesan referénsia ida ba ita hotu atu bele hadi’a ida-ne’e ba futuru taxa partisipasaun bele másimu liután,” nia dehan.
Jornalista : Nelson de Sousa
Editór : Cancio Ximenes
