Traballadór timor-oan serbisu iha Austrália hetan ona remesa millaun $200 resin
DILI, 23 maiu 2023 (TATOLI)—Diretór Diresaun Nasionál Empregu Exteriór hosi Sekretaria Estadu Formasaun Profisionál no Empregu (SEFOPE), Filomeno Soares, hateten, traballadór timor-oan sira ne’ebé hetan oportunidade bá serbisu iha Austrália liuhosi programa Australian Pacific Labor Mobility (PALM) hetan ona remesa hamutuk millaun $200 resin.
“Traballadór sira hetan remesa $259.569.880 iha tinan 2023, maibé konta hosi tinan 2014 to’o 2023 hetan hamutuk $296.538.747,22,” Diretór informa ba Agência Tatoli iha ninia knaar fatin, Becora, tersa ne’e.
Remesa hirak ne’e mai hosi traballadór hamutuk 4.756, kompostu hosi mane 3.403 no feto 1.362.
Notísia relevante : SEFOPE simu aplikante 55.436 hosi rezultadu rekrutamentu foun traballadór Austrália
Diretór dehan tan, remesa hosi traballadór sira ne’ebé serbisu iha Korea Súl iha tinan 2023 seidauk hetan.
“Maibé hosi tinan 2009 to’o 2022, traballadór 5.457 hetan osan $43.047.509,67. Remesa ne’e osan ne’ebé traballadór sira bá serbisu iha Austrália no Korea Súl hetan lori mai Timór, ida-ne’e osan ne’ebé tama sira-nia bolsu hato’o de’it ba SEFOPE hodi hatene maibé ida-ne’e la’ós reseita,” nia akresenta.
Nune’e, Diretór reforsa, SEFOPE kontinua halo esforsu hodi traballadór sira ne’ebé daudaun hein hela oportunidade bele hetan hotu oportunidade hodi bá serbisu iha Austrália no Korea Súl hodi hadi’a moris,” nia hateten.
Jornalista : Arminda Fonseca
Editora : Julia Chatarina
