iklan

EDUKASAUN, HEADLINE, POLÍTIKA

Akademista sujere Governu Dasiak mai ho kompozisaun moderada

Akademista sujere Governu Dasiak mai ho kompozisaun moderada

Dekanu Fakuldade Siénsia Sosiál, UNTL Camilo Ximenes.

DILI, 24 maiu 2023 (TATOLI) – Dekanu Fakuldade Siénsia Sosiál, Universidade Nasional Timor Lorosa’e (UNTL), Camilo Ximenes de Almeida, sujere atu formasaun Governu Dasiak mai ho kompozisaun ida moderada.

“Atu di’ak liután ne’e governasaun foun labele habokur ninia estrutura, signifika lalika iha sekretáriu Estadu barak. Depois, kuandu iha ona diretór-jerál lalika iha tan diretór sira seluk. Tanba ne’e, presiza halo ki’ik governasaun ne’e, maibé tenke tau duni ema ho méritu tuir duni nia fatin ka bele dehan the right man on the right place”, Camilo Ximenes dehan ba Tatoli iha Kampus Sentrál, kuarta ne’e.

Nune’e, nia husu atu governasaun ba dala-sia ne’e tenke koloka ema ne’ebé iha esperansa atu lori Governu ne’e ba susesu. “Labele koloka ema tuan, maibé laiha ona esperansa. Di’ak liu haree jerasaun foun ne’ebé iha vizaun hakarak servisu hamutuk hodi lori progresu, liuliu atu ajuda lori dezenvolvimentu ba nasaun hodi fó moris di’ak ba povu Timor-Leste”, Camilo Ximenes afirma.

Nia propoin molok atu koloka figura sira atu sai membru Governu Dasiak tenke husu sira-nia vizaun no misaun ba implementasaun programa sira ne’ebé hato’o ona iha kampaña.

“Atu nune’e iha fulan tolu primeiru, loron 100 ne’e, sira iha ona espetativa atu halo saida. Husi pontu de vista akadémiku nian, bainhira CNRT hakarak forma Governu ho modelu unidade nasionál, inkluzaun sosiál ou insidensiál parlamentár ne’e laiha problema, maibé importante liu maka labele iha de’it ibun tutun. Primeiru, tenke asegura tiha lai kadeira 31 ne’e to’o tiha 33 ba leten, depois maka CNRT bele ko’alia kona-ba modelu saida maka atu implementa iha IX Governu”, dosente ne’e realsa.

Tanba CNRT hakarak hadi’a rai ida ne’e ba tinan lima ba oin, tuir dekanu ne’e, tenke konserta nia planu no programa partidu nian tanba eleisaun 2023 ne’e hatudu ona CNRT mak sai vensedór hodi hetan kadeira 31 iha Parlamentu Nasionál.

“Ezemplu ida maka iha eleisaun 2017, iha Konstituisaun Repúblika la mensiona kona-ba governasaun minoria. Tanba ne’e, labele tenta atu koko tan governasaun minoria ida iha IX Governu ne’e. Signifika kadeira 31 ne’e mós laprienxe kuorun iha Parlamentu bainhira CNRT tenta hakarak forma Governu mesak maka la halo konsulta ho partidu haat seluk, bainhira tama ba Parlamentu maka CNRT ko’alia barak, ema foti liman de’it iha Parlamentu bele lakon buat hotu”, nia esplika.

Camilo Ximenes sujere buat ne’ebé maka CNRT presiza atu halo maka aumenta kadeira rua tan. “Entaun, CNRT presiza ko’alia ho partidu haat seluk ne’ebé maka ultrapasa barreira hanesan FRETILIN, PD, KHUNTO no PLP. CNRT iha posibilidade atu lobby ho sira ida ne’ebé maka iha posibilidade bele mai hamutuk”.

“Ha’u nia sujestaun katak husi partidu haat ne’ebé maka CNRT konsidera sira-nia prezensa iha IX Governu ne’e atu ezekuta orden la’ós atu halo orden foun. Sira mai atu prontu la’o hamutuk ho CNRT, maibé ezekuta de’it orden CNRT nian ne’ebé lidera husi Xanana Gusmão ne’ebé ho hanoin no objetivu ida de’it hakarak dezenvolvimentu no dada pipeline mai Timor-Leste”, akresenta.

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!