BAUCAU, 24 maiu 2023 (TATOLI) – Komisaun Nasionál Eleisaun (CNE, sigla portugés) konsidera eleisaun parlamentár tinan-ne’e iha Baucau hala’o ho susesu.
Diretór CNE Baucau, Esmerlado Damião Belo, esplika, durante preparasaun to’o realiza kampaña komísiu partidu polítiku iha Baucau, maske mosu dezentendimentu maibé la hamosu pertubasaun boot hodi afeta ba prosesu eleisaun parlamentár tinan-ne’e.
“Inísiu hahú hosi kampaña, eleisaun to’o apuramentu remata buat hotu la’o di’ak,” Diretór CNE Baucau informa ba Agência TATOLI iha Vila Nova, kuarta ne’e.
Hosi totál eleitór hamutuk 99.158, eleitór 23.74 mak la ezerse dereitu votu iha eleisaun tanba lista óbitu la elimina inklui eleitór balun iha estranjeiru maibé naran nafatin iha lista STAE Baucau nune’e afeta ba taxa partisipasaun.
Durante preparasaun ba eleisaun CNE hamutuk ho STAE hala’o atividade rua hanesan edukasaun sívika no edukasaun votante maibé hosi eleitór maioria ladún fó prioridade nune’e afeta ba votu nulu kontinua sa’e iha munisípiu Baucau ho tótal 1.238.
“Eleitór sira la interese iha atividade CNE no STAE tanba konsidera eleisaun sempre tuir nune’e votu nulu sa’e,” Damião Belo akresenta.
CNE Baucau rejista labarik barak mak partisipa iha kampaña komísiu partidu inklui mosu konflitu kiik iha Uailili, iha loron-domingu, 24 abril hafoin kampaña. Enkuantu iha loron eleisaun situasaun la’o hakmatek no susesu to’o apuramentu munisipál remata.
Jornalista : Natalino Belo
Editór : Evaristo Soares Martins
