Elementu migrasaun sei ba tuir estájiu profisionál iha Austrália
DILI, 24 maiu 2023 (TATOLI) – Primeira Sekretaria hosi Embaixada Austrália ne’ebé haree ba asuntu migrasaun no protesaun fronteira iha Timor-Leste Wanda Sendzimir, hulosi Austrália Department of Home Affairs, hala’o enkontru ho Vise-Ministru Interiór (VMI), Antonio Armindo, hodi ko’alia kona-ba servisu hamutuk hodi apoiu servisu migrasaun haforsa jestaun fronteira iha Timor-Leste atu haruka mós migrasaun timoroan balu ba tuir estájiu profisional iha Aeroportu Darwin Austrália iha fulan oin.
“Ohin halo enkontru ho mana Wanda hosi Home Affairs Austrália nian hodi halo diskusaun kona-ba esforsu signifikativu atu kombate krime tráfiku umanu no explorasaun ba ema seluk nia moris aleinde ne’e ami mós haree ona apoiu balun ba diresaun jerál servisu migrasaun nian hodi ba tuir estájiu iha Aeroportu Darwin ne’ebé sei finansia hosi Guvernu Austrália”, Antonio Armindo dehan liu hosi komunikadu ne’ebé TATOLI asesu, ohin.
Tuir nia, estájiu ba membru migrasaun ne’e sei hahú iha inísiu fulan juñu tinan ida ne’e nia-laran.
“Sira iha ona komitmentu atu ajuda servisu migrasaun, kada semana rua ita sei haruka membru migrasaun nain rua ba tuir estájiu profisional iha Austrália”, nia revela.
Antonio afirma, Guvernu Austrália sei apoiu membru migrasaun sira hodi halao mós investigasaun klean ba krime tráfiku sira, inisia ho proativu prosesu judisiál, kondena no kastiga trafikante sira bazeia ba lei ne’ebé vigór.
“Aban ha’u sei halo audiénsia ho Primeru-Ministru, Taur Matan Ruak, hodi aprezenta konseitu ida ne’ebé kompilla ona iha “Work Plan” kona-ba atu institusionaliza kurríkulum tráfiku espesífiku ba ofisiál servisu migrasaun sira ne’ebé sei inisia iha fulan oin”, nia salienta.
Governante ne’e rekuñese katak presija tebes apoia hosi parseiru internasionál sira hodi fó formasaun ba membru sira kona-ba leis tráfiku no identifikasaun ba vítima, tán neʼe, Governu inisiativa halo parseria ho Guvernu Austrália atu bele fó formasaun ba ofisiál migrasaun sira.
Estájiu ne’e membru migrasaun hosi Timor-Leste sei ba partisipa kada semana rua sei haruka ema na’in rua.
Jornalista: Hortencio Sanchez
Editór : Zezito Silva
