DILI, 24 maiu 2023 (TATOLI)—Fórum Organizasaun Naun Governamentál Timor-Leste (FONGTIL) kongratula Partidu Congresso Nacional Reconstrução de Timor-Leste (CNRT) ne’ebé sai vensedór Eleisaun Parlamentár 2023 no husu Governu foun mai tenke la’o kumpre promesa sira ne’ebé hato’o durante tempu kampaña.
Diretór Ezekutivu FONGTIL, Valentim da Costa Pinto ‘Koko’, hateten, antes ne’e parte sosiedade sivíl hato’o ona proposta ba membru Governu sira relasiona ho problema sosiál ne’ebé komunidade hasoru loron-loron iha área rurál.
“Ita hotu hatene Partidu CNRT mak sai vensedór ba Eleisaun Parlamentár tinan ne’e, ami-nia proposta mak husu sira atu mantein sira-nia kompromisu sira ne’ebé durante ko’alia iha kampaña fulan-ida nia-laran, ne’ebé hato’o vizaun no estratejia, nune’e karik ukun bele responde dezafiu sira ne’ebé ita-nia rai hasoru hanesan problema sosiál sira,” Diretór hato’o ba Agência Tatoli iha salaun Komisaun Nasionál Eleisaun (CNE, sigla portugés) Caicoli, kuarta ne’e.
Notísia relevante : Prezidente Partidu CNRT prefere hein rezultadu finál molok deklara formasaun Governu
Aleinde ne’e, nia sujere investe ba setór produtivu hodi ajuda Timor-Leste nia dezenvolvimentu, liu-liu iha área remota inklui apoiu polítika diversifikasaun ekonomia.
Nune’e mós, nia haree iha nível polítika tenke hanoin ona kona-ba eleisaun ba Komisáriu sira hanesan Komisaun Antí-Korrupsaun (CAC, sigla portugés) no instituisaun polítika sira hodi promove boa governasaun.
“Ami-nia esperansa maka sira tenke iha kompromisu ba kestaun ne’ebé sira ko’alia ona. Ami husu mós governasaun foun tenke halo jestaun ba prioridade sira no tenke define tuir saida mak ita presiza,” nia fó hanoin.
Husu mós atu Governu foun tenke hatudu sensibilidade ba Timor-Leste nia rekursu finansiamentu ne’ebé kontinua tun tanba úniku fonte mai hosi petrolíferu.
“Entaun hahú hanoin ona halo buat ruma atu iha rekursu finanseiru ne’ebé bele sustenta Estadu ninia funsionamentu. Tenke haree didi’ak kestaun sira ne’ebé hanesan má jestaun hanesan parte korrupsaun, ne’ebé ita espera labele akontese iha ita-nia nasaun kiik ne’e, entaun ita halo jestaun di’ak hodi ajuda Estadu moris ho di’ak,” nia dehan.
Biban ne’e, FONGTIL husu ba partidu vensedór bainhira forma Governu tenke haree ema tuir nia área.
“Ami-nia proposta mak despeza Estadu labele todan liu, ho hanoin bele forma Governu ne’ebé ho efisiente la mai ho membru Governu barak boot tanba sei fó despeza ba Estadu. Ita husu governasaun foun hahú haree ona sira-nia kuadru ne’ebé matenek, esperénsia, integridade no maturidade hodi bele prinxe tuir setór sira ne’ebé iha, nune’e bele kontinua hatudu no fó esperansa ba ita katak sei iha mudansa, tau ema tuir ninia fatin nune’e bele ajuda dezenvolvimentu la’o di’ak,” nia tenik.
Jornalista : Arminda Fonseca
Editora : Julia Chatarina