HNGV ‘’Salva moris fase ita-nia liman’’
DILI, 24 maiu 2023 (TATOLI) – Hospitál Nasionál Guido Valadares (HNGV) halo semináriu ijiene liman prevene rezisténsia antimikrobiu no infesaun asosia no kuidadu saúde hodi selebra loron mundiál ijiene liman ho tema salva moris fase ita nia liman.
Diretór Klinika HNGV, Marcelino Correia, hateten atividade ijiene liman ne’e, atu proteje moras sira, husi infesaun seluk no husi moras seluk.
“Ohin ita halo semináriu ijiene liman hodi prevene rezisténsia antimikrobiu no infesaun asosia no kuidadu saúde hodi selebra loron mundiál ba ijiene liman ho tema salva moris fase ita-nia liman, entaun iha momentu ida ne’e saida mak ita halao atu fó koñesementu ba profisionál saúde sira kona-ba bainhira halo atendementu no antes halo atendementu tenke fase liman bebeik, atu nune’e buat ne’ebé mak sai hanesan mikrobiu ka kauza moras ne’ebé mak ita la espera ita bele halo prevensain di’ak liután”, Marcelino Correia informa bainhira selebra loron mundiál ijiene liman iha HNGV, ohin.
Nia afirma, HNGV foti loron mundiál ijiene liman, ida ne’e ho objetivu ida atu bele hasa’e konsiénsia, oinsá mak prevensaun ne’e di’ak liután, atu nune’e moras ne’ebé mak ema hotu la espera infesaun nosokomia sira no mós atu prevene rezistensia mikrobiu ne’ebé mak akontese iha ospitál.
“Ita hatene katak kuaze ita iha ospitál mosu mikrobiu makas, ho ida ne’e atu bele fó hatene ita katak husi ijien importante tebes, tanba bainhira antes ita kaer ema moras no durante kaer ema moras presiza nafatin fase liman, fase liman ne’e buat ne’ebé mak kiik no buat ne’ebé besik liu, no sai hanesan importante liu atu bele halo prevensaun ba moras ida ne’e”, nia esplika.
Tanba ne’e, HNGV enkoraza ba enfermeiru no parteira hotu ne’ebé mak sai servi ba moras sira iha ospitál ho nafatin konsiénsia katak fase liman atu halao servisu loroloron.
Iha fatin hanesan, Ministra Saúde Odete Maria Freitas Belo, informa tinan-tinan mundu tomak selebra Loron Mundiál Ijiene Liman iha loron 5 Maio, ho objetivu atu promove no apoia kultura fase liman no mós aumenta konsiénsia no kompriensaun kona-ba prátika ijiene liman nu’udar dalan ida ne’ebé efikas ba prevensaun rezisténsia anti-mikrobiana no prevene infesaun nosokomial.
”Nu’udar profisionál saúde ita iha responsabilidade bo’ot atu sai ezemplu ne’ebé di’ak ba ita-nia pasiente no ita-nia família ka komunidade ne’ebé ita serve.Tanba ijiene liman nu’udar parte ita-nia moris, nu’udar buat ruma ne’ebé ita sente katak tenke asegura akontese sempre desde ita-nia moris no iha ne’ebé de’it, liuliu iha fatin servisu públiku hanesan fasilidades saúde sira”, Odete Belo subliña.
Iha fatin hanesan Organizasaun Mundiál Saúde iha Timor Leste Arvind Mathur, dehan semináriu sientífiku iha okaziaun loron Mundiál Ijiene Liman iha tinan 2023, atu rekoñese no louva servisu ne’ebeé di’ak husi Ministériu Saúde hodi promove ijiene liman no asegura povu nia saúde no moris di’ak.
“Hahalok ijiene mak hahalok ne’ebé simples no forte tebes ne’ebé iha poténsia salva moris. Tanba liman sai nu’udar bareira ba moras ne’ebé infetadu no prevene ema ba ema liuhosi transmisaun”, Arvind Marthur esplika.
Nia hateten, ijiene liman ne’ebé la adekuadu iha pontu kuidadu ne’ebé kontribuitór ba infesaun asosiadu. Prátika hirak ne’e iha ospitál, klínika no fasilidade saúde sira seluk mak importante atu asegura seguransa pasiente no prevene propagasaun infesaun nian.
Jornalista : Felicidade Ximenes
Editór : Zezito Silva
