DILI, 24 maiu 2023 (TATOLI) – Adjuntu Sekretáriu Jerál organizasaun internasionál g7+ Habib Mayar kongratula eleisaun parlamentár Timor-Leste nian ne’ebé hala’o iha semana kotuk la’o ho demokrátiku no susesu.
“Eleisaun foin lalais kapas tebes, ami livre tebes atu halo observasaun no fasil atu asesu iha sentru votasaun ne’ebé de’it ho nune’e mak ami kongratula tebes Timor-Leste nia eleisaun ne’e”, Habib dehan liuhosi konferénsia imprensa ne’ebé hala’o iha sekretariadu g7+ Dili, ohin.
Nia dehan, eleisaun ne’e sai ezemplu ida ba nasaun membru g7+ hotu atu banati tuir tanba hala’o ho livre, la taka buat ida ba observadór internasionál sira.
“Ami agradese tebes ba Governu Timor-Leste no autorieadade hotu iha nasaun ne’e, tanba organiza eleisaun ida livre tebes ba ema hotu partisipa”, nia relata.
Iha okaziaun ne’e, obserbadór hosi Sierra Leon Lery Fangawa hateten, eleisaun ne’ebé la’o kapas tebes no demokrátiku sai ezemplu ba nasaun membru hotu.
“Eleisaun iha Timor-Leste ne’e la’o kapas tebes, ami kongratula Governu Timor-Leste, durante ami observa la mosu fallansu ruma buat hotu la’o ho susesu”, Lery dehan.
Observadór hosi Guine-Bissaun Ferqando Monteiro reforsa eleisaun ne’e la’o duni ho profesionál no imparsiál.
“Misaun observasaun ami nian iha ne’e atu haree oinsa demokrasia iha nasaun ne’e, maibé ami haree buat hotu la’o ho di’ak, imparsiál no demokrátiku”, Fernando hateten.
Durante eleisaun g7+ iha ekipa lima ne’ebé destaka ba munisípiu tolu mak Dili, Liquiça no Manatuto konsege observa sentru votasaun hamutuk 83.
Totál observadór g7+ ne’ebé durante halo observasaun hamutuk na’in 15 hosi númeru ne’e na’in haat mai hosi internasionál no na’in 11 hosi nasionál.
Tinan ida ne’e g7+ planu atu observa eleisaun iha nasaun lima mak Guine-Bissau, Sierra Leone, Liberia, Repúblika Demokratika Kongo no Togo.
Jornalista: Hortencio Sanchez
Editór : Zezito Silva
