DILI, 24 maiu 2023 (TATOLI)–Primeiru-Ministru (PM), Taur Matan Ruak, kongratula partidu hotu ne’ebé partisipa ona iha Eleisaun Parlamentár (ElPar) tinan 2023.
“Hakarak parabeniza partidu sira hotu ne’ebé partisipa iha eleisaun, espesiál ba partidu vensedór Congresso Nacional Reconstrução de Timorense (CNRT),” PM Taur espresa bainhira ramata reuniaun semanál ho Prezidente Repúblika, iha Palásiu Prezidensiál, Bairru Pité, kuarta ne’e.
Xefe Governu hato’o agradesimentu ba sidadaun hotu ninia partisipasaun no kontribuisaun iha festa demokrasia inklui observadór sira, Polísia Nasionál Timor-Leste (PNTL), FALINTIL-Forsa Defeza Timor-Leste (F-FDTL), funsionáriu sira, liu-liu Sekretariadu Tékniku Administrasaun Eleitorál (STAE), Komisaun Nasionál Eleisaun (CNE, sigla portugés), fiskál, no jornalista sira, ba hotu-hotu nia kontribuisaun ba festa demokrasia la’o di’ak.
“Iha problema kiik-oan maibé kompara ho eleisaun sira seluk dala ruma neneik ita hadi’a di’ak liután, ida-ne’e kredibiliza no foti ita-nia prestíziu hanesan Estadu ne’ebé valoriza sistema demokrátiku Estadu direitu,” nia akresenta.
Notísia relevante : Prezidente Partidu CNRT prefere hein rezultadu finál molok deklara formasaun Governu
Atuál Prezidente Partidu Libertasaun Populár (PLP) ne’e deklara katak simu rezultadu eleisaun ne’ebé povu fó ona liuhosi eleisaun ne’ebé akontese iha loron 21 maiu liubá.
“Simu buat ne’ebé povu fó no la’ós buat ne’ebé ita hakarak, ita hakarak ne’e buat seluk ida, ha’u bele hakarak kadeira ualu mantein ka kadeira 20, maibé ida-ne’e la’ós buat ne’ebé povu hakarak, entaun ita simu ida-ne’ebé sira hakarak,” nia salienta.
Eis Xefe Estadu dehan, partidu hotu-hotu ninia mehi mak oinsá fó kontribuisaun ba dezenvolvimentu nasaun no ajuda kombate kiak.
“Tanba ita hotu hatene kiak multidimensionál iha ita-nia rain ne’e kuaze 50%, ne’e ita haree iha setór tolu importante hanesan rendimentu iha setór ekonómiku, edukasaun no saúde,” PM reforsa.
Bazeia ba rezultadu ElPar 2023 ne’ebé fó sai hosi STAE, CNRT hetan votu maioria hamutuk 288.101 (41,62%) kadeira 31 iha Parlamentu Nasionál, tuir fali Partidu Frente Revolucionária de Timor-Leste Independente (FRETILIN) ho votu 178.248 (25,75%) kadeira 19, Partidu Demokrátiku (PD) ho votu 64.493 (9,32%) kadeira neen, Partidu Kmanek Haburas Unidade Nasionál Timor-oan (KHUNTO) ho votu 52.021 (7,52%) kadeira lima no Partidu Libertasaun Populár (PLP) ho votu 40.696 (5,88%) kadeira haat no partidu seluk la liu barreira.
Hosi totál eleitór iha territóriu nasionál hamutuk 890.145, votu nulu 10.222, votu reklamadu 515, votu rejeitadu 58, votu branku 2.693, votu abandonadu 24 no votante ne’ebé vota ona hamutuk 795.583 (80,3%).
Jornalista : Antónia Gusmão
Editora : Julia Chatarina
