DILI, 24 maiu 2023 (TATOLI)—Primeiru-Ministru (PM), Taur Matan Ruak no Prezidente Repúblika (PR), José Ramos Horta, hasoru malu hodi diskute kona-ba tranzisaun Governu tanba Eleisaun Parlamentár 2023 ramata ona, ne’ebé rezultadu finál provizóriu hatudu katak Partidu Congresso Nacional Reconstrução de Timorense (CNRT) mak sai vensedór.
“Ami na’in-rua Prezidente Repúblika diskute kona-ba tranzisaun, ne’ebé ha’u informa ba Prezidente Repúblika katak ami preparadu loos,”PM Taur hateten hafoin reuniaun ho Xefe Estadu iha Palásiu Prezidensiál iha Bairru Pité, kuarta ne’e.
PM Taur informa, VIII Governu sei realiza reuniaun Konsellu Ministru (KM) ikus iha loron 07 juñu 2023.
“Loron ne’e nu’udar loron ne’ebé Tribunál rekursu fó sai hodi konfirma rezultadu eleisaun no publika iha Jornál Repúblika. Enkuantu tuir mai ami hein de’it ona membru IX Governu bele mai, ami simu no entrega tranzisaun ne’e,” nia akresenta.
Notísia relevante : Prezidente Partidu CNRT prefere hein rezultadu finál molok deklara formasaun Governu
Bazeia ba rezultadu ElPar 2023 ne’ebé fó sai hosi STAE, CNRT hetan votu maioria hamutuk 288.101 (41,62%) kadeira 31 iha Parlamentu Nasionál, tuir fali Partidu Frente Revolucionária de Timor-Leste Independente (FRETILIN) ho votu 178.248 (25,75%) kadeira 19, Partidu Demokrátiku (PD) ho votu 64.493 (9,32%) kadeira neen, Partidu Kmanek Haburas Unidade Nasionál Timor-oan (KHUNTO) ho votu 52.021 (7,52%) kadeira lima no Partidu Libertasaun Populár (PLP) ho votu 40.696 (5,88%) kadeira haat no partidu seluk la liu barreira.
Hosi totál eleitór iha territóriu nasionál hamutuk 890.145, votu nulu 10.222, votu reklamadu 515, votu rejeitadu 58, votu branku 2.693, votu abandonadu 24 no votante ne’ebé vota ona hamutuk 795.583 (80,3%).
Jornalista : Antónia Gusmão
Editora : Julia Chatarina
