Implementasaun PMOPA faze dahuluk iha Covalima finaliza ona
COVALIMA, 25 maiu 2023 (TATOLI)—Sekretáriu Administrasaun munisípiu Covalima, Francisco de Jesus Alves, hateten implementasaun Programa Mão de Obra Postu Administrativu (PMOPA) faze dahuluk finaliza ona iha Munisípiu Covalima.
“Implementasaun Programa Mão de Obra Postu Administrativu (PMOPA) faze dahuluk, ita konklui sira-nia servisu ona, implementa iha postu administrativu-sira, munisípiu Covalima maibé atu ba faze daruak, ita sei hein trimester daruak hafoin ramata trimestre daruak foin implementa,” Francisco de Jesus Alves hateten ba Agência Tatoli iha nia servisu fatin, Sukaer Laran, kinta ne’e.
Nia dehan, atu implementa programa ba faze daruak depende ba Governu foun nia programa, tanba forma ona governasaun foun nia desizaun atu kontinua implementa programa ida-ne’e ka la’e depende desizaun hosi nivél nasionál.
Maske desizaun hosi governasaun foun atu implementa PMOPA faze daruak maibé orsamentu tau ona kada postu administrativu-sira ne’ebé kada postu administrarivu ho nia orsamentu rihun 100.
Hafoin finaliza implementa programa PMOPA relata ona relatóriu PMOPA ba administrasaun munisípiu Covalima liuhosi servisu munisipál finansa nian.
“Ami-nia karta konvite sai ona atu halo enkontru hodi halo avaliasaun hodi atualiza informasaun kona-ba progresu servisu implementasaun PMOPA no planu asaun anuál tinan 2024, maibé administradór munisípiu Covalima ho diretór finansa sei ba Dili tuir formasaun,” nia dehan.
Implementasaun PMOPA iha Covalima prioridade ba programa sira hanesan, postu administrativu balun fó prioridade ba halo reflorestasaun, limpeza, hadi’a estrada tanba servisu ne’ebé mak uza ema-nia forsa la uza mákina pezadu sira depende ida-idak nia planu.
Implementasaun PMOPA iha kada postu administrativu aloka orsamentu rihun 100 ho nia ezekusaun ba faze dahuluk ezekuta 50% no ba faze daruak nia ezekusaun 50%.
Jornalista : Celestina Teles
Editór : Cancio Ximenes
