DILI, 25 maiu 2023 (TATOLI)—Diretór Sentru Nasionál Empregu no Formasaun Profisionál Tibar, munisípiu Liquiçá, Simão Tito Barreto, informa, joven hamutuk 6.649, kompostu hosi feto 1.436 mane 5.213 hetan ona sertifikadu profisionál, hahú tinan 2002 to’o 2023.
“Ita sei gradua joven hamutuk 443 ba tinan ida-ne’e,” Diretór hateten ba Agência Tatoli, liuhosi programa entrevista eskluziva iha estúdiu Farol, kinta ne’e.
Sentru Formasaun Tibar fó formasaun ho akreditasaun hosi Institutu Nasional Dezenvolvimentu Mão de Obra, Institutu Públiku (INDMO, I.P) hanesan kontrusaun jerál nível I kompostu hosi alvenaria, karpintaria, eletrisidade, kanalizasaun no soldadura, enkuantu formasaun Alvenaria, karpintaria, kanalizasaun, eletrisidade, painél solár, indústria marítima no portu, no ospitalidade iha nível I no II, inklui lideransa iha projetu, operasaun no manutensaun bomba bee no elétrika.
Notísia relevante : Governu presiza envolve sentru Formasaun Tibar iha manutensaun patrimónia Estadu
Aleinde ne’e, iha mós formasaun kona-ba jestaun portu marrítima, eletrisidade instrumentasaun, auto mekánika no operadór pezada, enerjia limpa no adaptasaun mudansa klimátika no dezenvolvimentu inkubadora empreza.
Diretór dehan, formandu sira ne’ebé hetan ona graduasaun balun serbisu ona iha indústria mina hanesan Pertamina, Esperansa Timoroan (ETO), iha área ospitalidade nível III, balun serbisu iha Hotel Timor, Otél Esplanada no seluk tan.
Empreza Hilton Internasionál Fatuhada kontrata formandu barak hodi serbisu iha parte konstrusaun sivíl.
“Ami envolve mós formandu barak ba programa seasonal worker bá Austrália no Koreia Súl,” nia dehan.
Sentru ne’e rasik tutela ba Ministériu Koordenadór Asuntu Ekonómiku (MKAE) maibé iha autonomia administrativa finanseira no patrimóniu hodi jere rasik, ne’ebé serbisu hamutuk ho Sekretaria Estadu Formasaun Profisionál no Empregu (SEFOPE) iha responsabilidade atu kapasita formandu sira ho kualidade, nune’e bele hetan empregu no hasa’e koñesimentu teoria no prátika liuhosi formadór rai-laran no estranjeiru hodi kontribui ba dezenvolvimentu iha Timor-Leste.
Jornalista : Arminda Fonseca
Editora : Julia Chatarina
