PNDS suspende konstrui UNP unidade tolu iha Zumalai
COVALIMA, 25 maiu 2023 (TATOLI)—Diretór Programa Nasionál Dezenvolvimentu Suku (PNDS) Munisípiu Covalima, Filipe Cardoso, hateten PNDS suspende konstrui Uma Naroman ba Povu unidade tolu iha aldeia Horba, suku Lepo, postu sdministrativu Zumalai, munisípiu Covalima tanba laiha estrada atu mobiliza materiál konstrusaun.
“Implementasaun Uma Naroman ba Povu (UNP) regulár tinan fiskál 2021 iha Covalima ho totál UNP unidade 90. Hosi númeru ne’e, sira seluk entrega ona ba benefisiáriu sira maibé falta UNP unidade tolu ne’ebé implementa iha aldeia Horba, suku Lepo Aldeia, agora ita suspende,” Filipe Cardoso hateten ba Agência Tatoli, iha nia servisu fatin, Sukaer Laran, kinta ne’e.
Razaun to’o ohin loron Programa Nasionál Dezenvolvimentu Suku (PNDS), sei suspende konstrusaun Uma Naroman ba Povu (UNP) tanba la asesu ba estrada kuaze distánsia kilometru lima (5).
Ho nune’e, nia dehan, konstrusaun UNP unidade tolu nia orsamentu la gastu maske la halo konstrusaun UNP unidade tolu ba benefisiáriu sira ho razaun laiha estrada atu mobiliza materiál konstrusaun ba aldeia Horba.
“Ami halo esforsu halo komunikasaun ho Sekretáriu Tékniku PNDS Nasionál oinsá atu halo aproximasuan hosi Intituisaun Jestaun Ekipamentu (IGE-sigla portugés) hodi apoiu loke estrada maibé laiha solusaun,” nia dehan.
Aleinde ne’e, ekipa PNDS halo esforsu halo servisu voluntáriu hamutuk ho komunidade hamoos estrada kuaze kilo ida, maibé tempu udan foin lalais hetan estragu nune’e obra ne’ebé atu konstrui UNP unidade tolu to’o ohin-loron seidauk halo konstrusaun.
Implementa UNP unidade 90 iha tinan fiskál 2021 ne’e, ho tipu uma 48 metru kuadradu hamutuk 65 ho nia tipu uma 37 metru kuadradu hamutuk 25.
Ekipa Programa Nasionál Dezenvolvimentu Suku iha Covalima konstrui UNP unidade 90, implementa iha postu administrativu hitu (7) ne’ebé implementa iha suku 30 ho nia orsamentu hamutuk $1,491.000.00.
Entertantu, Diretór PNDS Covalima Filipe Cardoso relata, progresu konstrusaun Uma Naroman ba Povu (UNP) tinan fiskál 2022 ho unidade 278 ne’ebé daudaun ne’e nia progresu implementasaun atinje ona 50%.
“UNP regulár ba munisípiu Covalima ba tinan fiskál 2022, hamutuk UNP unidade 278. Hosi númeru ne’e, komulativu nia progresu fíziku, ita atinje 50%,” nia hateten.
Ho nune’e, nia informa, bazeia ba kontratu implementa konstrusaun UNP ho nia durasaun tempu loron 120, maibé realidade implementasaun tarde tanba prosesu materiál fornesedór fornese ne’e sosa iha nasionál.
“Ita rekoñese tarde tanba badaen ho traballadór sira-ne’ebé atu aselera servisu maibé depende materiál ne’ebé fornese hosi kada fornesedór,” nia esplika.
Ekipa PNDS konstrui UNP tinan fiskál 2022 hamutuk unidade 278 ne’ebé implementa iha postu administrativu hitu (7) iha suku 30, ho nia orsamentu hamutuk $4,735 ,452.
Jornalista : Celestina Teles
Editór : Cancio Ximenes
