Telkomcel no ZTE asina akordu hodi moderniza tan servisu telekomunikasaun
DILI, 25 maiu 2023 (TATOLI)—Telin Timor-Leste liuhosi operadór telekomunikasaun selular Telkomcel no empreza ZTE asina nota entendimentu hodi moderniza servisu telekomunikasaun iha Telkomcel ne’ebé opera iha Timor-Leste.
Nota ne’e asina hosi Diretór Ezekutivu Telkomcel, Benedictus Ardiyanto Priyo, Vise-Prezidente Finanseiru no Komersiál Parseiru Telkomcel, Dedy Edward Ambarita ho Diretór Komersiál Korporasaun ZTE, Wu Wwi no Diretór Ezekutivu ZTE, Richard Liang, iha edifísiu Nexus Meeting Room, andar 16 Telkom Landmark Tower iha Jakarta, Indonesia, iha loron 22 maiu 2023.
Objetivu hosi kolaborasaun ne’e hodi hasa’e kualidade Mobile Network Operator (MNO) Virtual Core, Business Support Systems (BSS), Value Added Services (VAS) Solution Telkomcel inklui hasa’e liña 5G, ne’ebé sei ramata iha trimestre datoluk tinan ne’e no estabelese presu ba kustu propriedade inklui presu unidade ne’ebé sei aplika durante tinan-lima.
“Inisiativa ne’e sei fó benefísiu signifikativu ba povo Timor-Leste no melloria preformánsia rede di’ak liu iha segementu retallu no empreza, Governu, Organizasaun Naun Governamentál (NGO), setór privadu, no seluk tan,” refere nota komunikadu ne’ebé Agência Tatoli asesu, kinta ne’e.
Notísia relevante : MTK no Telkomcel alarga konetividade to’o postu administrativu
Aleinde ne’e, bele hadi’a infraestrutura rede sai efetivu liután no fornese servisu lian no kualidade dadus di’ak ba kliente sira.
Nota entendimentu ne’e reforsa parseria entre parte rua inklui bele fahe koñesimentu ba funsionáriu.
Nune’e mós, Telkomcel hakarak utiliza teknolojia avansadu hosi ZTE hodi promove inovasaun no transformasaun dijitál iha Timor-Leste.
Telkomcel nu’udar operadór selular iha Timor-Leste, ne’ebé kontrola hosi Telkom Indonézia Internasional SA, Telin Timor-Leste, subsidiária hosi empreza PT Telkom Indonézia, ne’ebé hanesan empreza ida iha área negósiu servisu selular, servisu solusaun emprezariál inklui grosista internasionál.
Enkuantu, empreza ZTE nu’udar fornesedór solusaun komunikasaun no informasaun integradu iha mundu globál ne’ebé ho teknolojia inovativu.
ZTE fornese produtu ne’ebé fó solusaun ba kliente, operatór telekomunikasaun globál, Governu no empreza sira hotu.
Durante ne’e ZTE oferese ona servisu ba nasaun 160 no atende ema ¼ iha mundu, ho kompromisu atu alkansa konetividade no konfiansa iha futuru no iha ne’ebé de’it.
Serimónia asinatura nota ne’e asiste hosi Prezidente Konsellu Administrasaun Telin Timor-Leste, Widjajanto Budi S, Sekretáriu daruak Embaixada Timor-Leste, Hermani Teotonio Barros Magno.
Jornalista : Arminda Fonseca
Editora : Julia Chatarina
