HEADLINE, MUNISÍPIU, OÉ-CUSSE (RAEOA), SOSIEDADE SIVĺL

Ahi haan uma ida iha suku Usitasa’e Oé-Cusse

Ahi haan uma ida iha suku Usitasa’e Oé-Cusse

Ahi haan mutuk uma ida iha suku Usitasa'e Oé-Cusse. Imajen espesiál

OÉ-CUSSE 26 maiu 2023 (TATOLI) – Iha sesta ne’e, tuku 08:30 akontese inséndiu ahi haan uma iha bairru Oélfaub, aldeia Pune, suku Usitasa’e, sub-rejiaun Oésilo, Rejiaun Administrativa Espesiál Oé-Cusse Ambeno (RAEOA).

Pedru Sufa, nu’udar viziñu konta kronolojia akontesimentu katak, uma na’in laiha hela, de’it labarik ida mak hein uma, tanba inan-aman iha hela Oé-Cusse vila ko’a hare.

“Ahi ne’e mosu primeiru hosi uma kakuluk, tanba uma du’ut, ne’ebé ahi mosu boot kedas hosi leten, agora uma na’in sira mós laiha, hela labarik ida mak hein uma, maibé ohin akontese, nia sai hela iha viziñu sira, tanba nia inan-aman ko’a hela hare iha Oénasi, Oé-Cusse Vila, labarik ne’e mesak mak hein uma kuaze seman ida ona,” sasin Pedro Kolo, ba Agência Tatoli liuhosi telefonika.

Nia hatete, uma na’in ne’e nia naran kompletu, Agustinho Neno Afoan no Filomena Sufa, maibé hafoin akontese informa kedas ba autoridade komunitáriu hodi hato’o pedidu apoia emerjénsia iha Autoridade Protesaun Sivíl (APC).

“Sasán la aproveita, hahán roupa no seluk tán ahi haan mutuk tiha, tanba akontese uma na’in laiha, ami haree ahi suar sa’e, mak ami hakfodak halai ba, maibé labele halo buat ida, tanba ahi maka’as ona,” nia afirma.

Nune’e Prezidente Autoridade Protesaun Sivíl Oé-Cusse, Inspetor Polísia, Herman Metan, informa, parte Autoridade Protesaun Sivíl simu ona pedidu ne’e, dezloka kedas ekipa ba fatin akontesimentu.

“Ohin dader tuku 08:30 ne’e mak akontese ahi haan uma ida iha bairru Oélfaub, suku Usitasa’e iha ne’ebá informadór mensiona, katak ahi han uma ida inklui dapur, entaun ohin dadeersan kedas, ekipa APC deszloka kedas ba fatin akontesimentu atu halo verifikasaun no oferese apoia emerjénsia imediata,” nia katak.

Tuir nia, kona-bá kronolojia akontesimentu, tanba saida mak akontese, ahi ne’e mai hosi ne’ebé, daudaun ne’e ekipa APC iha ona dalan atu halo verifikasaun ba nia kauza kronolojia akontesimentu.

Maibé APC prepara ona apoia, entaun apoia emerjénsia ne’ebé maka oferese ba vítima inséndiu ne’e item rua, food item hanesan foos, supermie, sardina ikan-lata, mina bimoli, susu-been, enkuantu la’os food item hanesan sasán dapur nian, lona, bikan kanuru, sanan no tasu.

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!