Progresu konstrusaun UNP+ A iha Covalima atinje ona 50%
COVALIMA, 26 maiu 2023 (TATOLI)—Diretór Programa Nasionál Dezenvolvimentu Suku (PNDS) Covalima, Filipe Cardoso, hateten progresu implementasaun Uma Naroman ba Povu Plus (UNP+ A) unidade 75 ne’ebé implementa iha postu administrativu Maucatar, munisípiu Covalima atinje ona 50%.
“Progresu Uma Naroman ba Povu Plus A ne’ebé implementa iha postu administrativu Maucatar, iha covalima atinje ona 30-50% ne’ebé oras ne’e daudaun prosesu konstrusaun la’o hela,” Filipe Cardoso hateten ba Agência Tatoli iha nia kna’ar fatin, Sukaer Laran, sesta ne’e.
Konstrusaun UNP+ A foin mak atinje 30 to’o 50% ne’e, tanba prosesu konstrusaun fíziku iha terrenu ne’e foin mak fui sinta jerál maibé konstrusaun ba uma refere kontinua la’o hela.
Tuir kalendáriu, prosesu konstrusaun UNP ho nia durasaun tempu durante fulan tolu (3), maibé realidade iha faze implementasaun la kumpre kalendáriu implementasaun ho razaun PNDS implementa volume atividade barak iha munisípiu Covalima.
PNDS implementa projetu boot iha Covalima hanesan postu administrative Maucatar, Fohorem no Tilomar implementa projetu UNP+ A, reabilitasaun sede suku 12 no UNP regulár no atividade PNDS regulár.
Ho atividade hirak ne’ebé atribui ba PNDS implementa iha Covalima ekipa PNDS destaka kontrola volume atividade PNDS barak.
Tanba ne’e, mekanizmu implementa hodi aumenta Ekipa Jestaun Suku (EJS) no ba iha ekipa jestaun suku aumenta Sub EIP.
Aleinde ne’e, nia dehan, progresu konstrusaun UNP+ B ne’ebé implementa iha postu administrativu Suai, suku lima (5) ho nia benefisiáriu 185 ne’ebé bazeia ba monotorizasaun hosi PNDS progresu atinje ona 90%.
“Implementasaun UN + B ne’ebé implementa iha postu Suai, suku lima, munisípiu Covalima atinje ona 90% no falta 10%, tanba benefisiáriu sira halo mudansa ba konstrusaun uma fiíziku la signifika sira atu abandona,” nia dehan.
Antes ne’e, iha loron 02 fulan-fevreiru, Ministru Administrasaun Estatál (MAE) Miguel Perreira de Carvalho distribui ona zinku ba benefisiáriu Uma Naroman ba Povu plus B hamutuk 185, iha postu administrativu suai, munisípiu Covalima.
Jornalista : Celestina Teles
Editór : Cancio Ximenes
