CNE simu keixa no reklamasaun 11 hosi sentru votasaun 1.472
DILI, 27 maiu 2023 (TATOLI)—Komisária Komisaun Nasionál Eleisaun (CNE), Odete Maria Belo, hateten iha prosesu apuramentu nasionál ne’e, CNE simu keixa no reklamasaun hamutuk 11 ne’ebè mai hosi sentru votasaun hamutuk 1.472 ho apuramente munisipál, rejionál no diáspora.
Notísia Relevante: Enseramentu apuramentu nasionál, CNE atribui votu 191 ba CNRT
“Maibé hosi keisa ho reklamasaun sira-ne’e, iha reklamasaun rua (2) mak la identifika reklamante tanba la hakerek aan tuir prosedimentu normál hato’o keixa ka reklamasaun nian. Tanba ne’e, CNE la prosede keixa rua ne’e. Agora keixa ho reklamasaun ne’ebé CNE prosede iha prosesu apuramentau nasionál hamutuk sia (9) no hosi númeru ne’e keixa haat (4) mak iha indisiu krime, tanba ne’e CNE sei partisipa ba Ministériu Públiku,” Komisária CNE ne’e hateten liuhosi konferénsia imprensa iha CNE Colmera, Dili, sábadu ne’e.
Nia dehan, keixa lima (5) ne’e mosu iha prosesu kontajen votu, hamosu buletin reklamada no CNE prosede no deside tuir kompeténsia CNE nian atribui iha lei ka solusiona tuir lei haruka, apuramentu nasionál iha CNE tuir tempu legal durante oras 72 nia laran.
“Nune’e, ohin, tama ona ba loron datoluk, prazu legál tuir termu lei hateten sei kompleta oras 72 no iha 27 maiu tuku 10h00 dadeer, CNE konklui prosesu sira no konfere akta orijinál hosi sentru votasaun hamutuk 1.472 iha territóriu nasionál no diáspora. Akta hirak ne’ebé apuradu iha apuramentu nasionál durante oras 72 nia laran, ohin atinje ona 100%. Akta ikus liu ne’ebé ohin ita insera mak akta hosi Reinu Unidu no Irlanda do Norte,” nia hateten.
Aleinde ne’e, nia hateten, CNE identifika diskrepánsia numérika hosi akta eletrónika iha apuramentu nasionál ne’ebé akontese iha Lautém no Ermera.
“Diskrepánsia númerika vota sira-ne’e, mai hosi akta eletróniku rezultadu apuramentu munisipál hosi munisípiu Ermera iha ida (1) no hosi Lautém hetan ida (1). Akontese diskrepánsia refere mai hosi munisípiu Lautém tanba votu refere eleitór lori ba uma mak mai hatama iha urna laran momentu nia vota maibé CNE fó solusaun kedas,” nia dehan.
Jornalista : Osória Marques
Editór : Cancio Ximenes
