APC rejista uma-kain 10 afeta ba dezastre naturál
DILI, 29 maiu 2023 (TATOLI) – Xefe Komunikasaun Autoridade Protesaun Sivíl (APC, sigla portugés), João de Sousa Filipe, relata situasaun dezastre naturál iha semana ida, hahú iha loron 23 to’o 29 maiu rezulta uma-kain 10 mak sofre ba dezastre naturál.
“Iha semana ida ne’e hahú iha 23 to’o iha loron 29 maiu 2023, dezastre natural hanesan udan akontese iha territóriu laran iha uma-kain 10 mak afetadu ba dezastre naturál”, João de Sousa hateten ba jormalista sira iha edifísiu APC Caicoli, segunda ne’e.
Nia dehan, iha uma-kain 10 mak afetadu ba dezastre naturál hanesan iha Munisípiu Bobonaru, RAEOA, Covalima, Viqueque inklui Baucau. Ahi-han uma ida iha Baucau, ai-han uma ida, Bobonaru, anin sobu uma-kain haat, Covalima ahi-han uma ida no RAEOA ahi-han uma-kain ida.
Iha Munisípiu Bobonaro Postu Lolotoe akontese iha Suku Opa, Aldeia Raimean, anin estraga uma-kain ida, Munisípiu Baucau, Postu Adminstrativu Laga ahi-han uma-kain ida.
Iha Munisípiu Covalima, Postu Suai, Suku Debus, Aldeia Asurai akontesimentu iha loron (26/5) ahi-han komunidade nia-uma ida, iha RAEOA Sub-Rejiaun Oesilu, Suku Ostasai, Aldeia Buki iha loron 26 maiu 2023, anin sobu komunidade nia uma ida.
Munisípiu Viqueque, Postu Administrativu Viqueque Villa, Suku Uma Wain-Leten, ahi hán komunidade nia-uma ida no iha Suku Bahalariwai, Aldeia Kaninu akontese ahi han komunidade nia-uma. Dadus sira ne’e mai hosi Sentru Operasaun Dezastre Munsípiu sira.
“Ekipa mós halo ona levantamentu dadus no verifikasaun ona ba kumunidade sira nia uma ne’ebé mak ahi han no afetadu ba dezastre naturál. Iha munisípiu lima ne’ebé afeta dezastre naturál, depois akontesimetu, maioria ita responde hotu ona hodi fó apoia emerjénsia”,
Jornalista: Natalino Costa
Editór : Zezito Silva
