Autoridade Covalima muda negosiánte faan sasán iha trotoar leten
COVALIMA, 29 maiu 2023 (TATOLI)—Autoridade liuhosi Sekretáriu Administrasaun Munisípiu Covalima, Francisco de Jesus Alves, hamutuk ho Servisu Munisipál Jestaun Merkadu no Turizmu muda negosiánte sira halo negósiu iha trotoar leten iha merkadu Debos, munisípiu Covalima.
“Ohin, ami hala’o asaun. Molok ne’e, ami hala’o enkontru dala-barak ona ho ita-nia negosiénte-sira no hasai ona sirkulár ba sira, oinsá atu mantein ijiene hodi kontrola lixu merkadu laran no muda sira ne’ebé faan iha trotoar leten,” Francisco de Jesus Alves hateten ba jornalista sira, iha merkadu Debos, segunda ne’e.
Razaun muda negosiante sira faan iha trotoar leten, nune’e atu labele hamosu engarafamentu movimentu ema no transporte públika iha parte merkadu Debos.
Nia dehan, durante negosiánte faan sasán iha trotoar leten, hamosu engarafamentu no ema labele halo movimentu iha parte merkadu, nune’e autoridade Covalima liuhosi servisu munisipál Jestasaun no Turizmu halo ona akordu hodi munda negosiánte sira faan sasán iha trotoar leten.
“Auotidade muda negosiánte ne’e liuhosi desizaun ida iha enkontru koordenasaun munsipál katak negosiante sira-ne’ebé mak loke kioske iha trotoar leten n’e ita taka hotu, nune’e sira ba fali faan iha merkadu laran atu ema ema hotu bele hetan oportunidade,” nia hateten.
Maske negosiante sira hato’o preokupasaun negosiánte sira, maibé tenke koopera ho autoridade munisípiu Covalima ne’ebé hasai ona sirkulár ida atu negosiante sira bele kumpre.
“Ohin, iha ona akordu liuhosi verbal de’it no la liuhosi karta ruma, maibé sira hotu aseita ba oin bainhira faan sasán iha trotoar leten, ami la fó oportunidade atu halo diskusaun no ami sei taka fatin refere,” nia hateten.
Negosiánte Marcelo Andrade aseita desizaun hosi autoridade Covalima ne’ebé deside muda negosiánte sira ne’ebé faan iha trotoar leten nune’e labele hamosu movimentu transporte públiku no ema iha merkadu Debos bele seguru.
“Ami aseita desizaun hosi autoridade Covalima ne’ebé haruka ami lakohi tau sasán iha trotoar leten, maibé tenke rai iha uma laran. Nune’e, bainhira negosiánte sira hakarak rai sasán iha trotoar leten bainhira ekipa jestaun foti mós ami labele ko’alia tanba halo ona akordu,” nia hateten.
Bazeia baze legál dekretu-lei númeru 33/2008 ko’alia kona-ba ijiene órden Públika hanesan atu halo jestaun ba lixu, movimentu ema no animál, dekretu-lei númeru 3/2016 segunda alterasaun dekretu-lei númeru 53/2020 kona-ba kompeténsia Administrasaun Munisípiu Covalima halo jestaun merkadu iha munisípiu Covalima
Jornalista : Celestina Teles
Editór : Cancio Ximenes
