DILI, 29 maiu 2023 (TATOLI)—Deputada hosi bankada CNRT iha Parlamentu Nasionál, Virginia Ana Belo, sujere ba Governu no Parlamentu Nasionál atu hasai rezolusaun ruma ba viajen serbisu Estadu ba rai-li’ur atu uza aviaun Aero Dili.
“Hanoin iha esperiénsia lubun ida ona. Se bele Governu ka Parlamentu Nasionál, ita iha rezolusaun ruma para depois kualkér viajen Estadu ninian ba iha serbisu, tantu Deputadu, membru Governu, diretór sira hotu-hotu, se bele uza aviaun ita nian Aero Dili, para depois bele iha kompetisaun ne’ebé justu liu ba populasaun baibain no ba ema sira seluk. Ita fó livre hili tuir ninia kapasidade, maibé se bele sujere Governu ho Parlamentu bele iha akordu ka konkluzaun ida, katak bele iha rezolusaun ruma fó oportunidade ba kualkér viajen ho serbisu ita bele uza ita-nia aviaun,” Deputada CNRT ne’e hato’o liuhosi reuniaun plenária PN, segunda ne’e.
Nia kongratula empreza timoroan ne’ebé halo investimentu iha setór dezenvolvimentu aviasaun iha Timor-Leste.
“Dala ita tan parabéns ba ita-nia empreza Timor ne’ebé bele fornese aviaun Aero Dili mai iha ita-nia rai, para depois iha kompetisaun ho aviaun sira seluk ne’ebé hosi Indonézia nian,” nia hateten.
Hatán ba ida-ne’e, Prezidente Parlamentu Nasionál, Aniceto Longuinhos Guterres Lopes, hein katak iha inisiativa ruma hosi Deputadu sira tanba Deputadu sira iha poder atu aprezenta inisiativa hafoin iha prosesu ita hasai rezolusaun klaru sei ko’alia ho Governu.
Jornalista : Nelson de Sousa
Editór : Cancio Ximenes
