NASIONÁL, EDUKASAUN, HEADLINE

Eskola neen ne’ebé tama iha PKR hasoru difikuldade

Eskola neen ne’ebé tama iha PKR hasoru difikuldade

Diretór Nasionál Dezenvolvimentu Parke Eskolár, Agostinho Soares. Imajen Tatoli/Francisco Sony.

DILI, 29 maiu 2023 (TATOLI) – Eskola neen ne’ebé tama iha projetu konstrusaun no reabilitasaun (PKR) 2022 atinje ona 68%, maibé hasoru hela difikuldade tanba kondisaun terrenu la permite atu aselera projetu refere.

Diretór Nasionál Dezenvolvimentu Parke Eskolár (DNDPE), Agostinho Soares, dehan iha eskola hamutuk 56 maka sei iha prosesu konstrusaun no reabilitasaun, maibé entre númeru ne’e iha eskola neen maka seidauk hetan asesibilidade tanba iha difikuldade ho kondisaun terrenu bainhira udan boot halo transporte sira difisil asesu ba estrada.

“Eskola neen ne’e maka eskola bázika rua iha Ainaro, iha Maneloba ho Manetu, ida iha Viqueque, suku Oe-bobo, tuirmai ida iha Bobonaru no rua iha Baukau, iha matebian hun”, dehan Agostinho ba Tatoli iha Vila Verde, segunda ne’e.

Nia hatete iha eskola 50 maka sira-nia materiál konstrusaun no ba reabilitasaun distribui hotu ona no rezultadu husi progresu fíziku sira konsege atinje ona entre 70 no 80%.  “Espera katak fulan juñu ne’e projetu konstrusaun no reabilitasaun bele konklui ona”, katak.

Ba PKR ne’e Ministériu Edukasaun, Juventude no Desportu halo hotu ona pagamentu, maibé ba eskola neen ne’e maka seidauk bele halo akizizaun ba ekipamentu sira, nune’e DNDPE kontinua husu ba eskola sira atu nafatin akompaña kondisaun terrenu kuandu iha posibilidade bele asesu ona ba estrada maka aselera prosesu ne’e, tanba durasaun tempu ba PKR 2022 nian tenke finaliza iha agostu 2023 ne’e.

“Ita komprende tebes kondisaun no situasaun iha terrenu ne’ebé maka eskola neen ne’e enfrenta, maibé ita mós husu ba sira atu akompaña situasaun karik kondisaun iha terrenu maka normaliza ona bele halo ona kompras atu nune’e bele hahú ona PKR ne’e”, salienta

Lembra katak eskola 202 mak tama iha PKR no husi totál  ne’e inaugura ona eskola 146 no sei falta eskola 56 maka sei iha hela prosesu nia laran.

MEJD prevee orsamentu hamutuk millaun $20 resin ba PKR eskola 202 iha territóriu.

Jornalista: Tomé Amado

Editora: Maria Auxiliadora

iklan
iklan

Leave a Reply

iklan
error: Content is protected !!